Recientemente a tuma luga e conferencia di ACURIL (The Association of Caribbean University, Research and Institutional Libraries) na Kingston, Jamaica.
Titulo di e conferencia tabata “Innovation: Opportunities and challenges in libraries, museums and archives in the Caribbean”. Na e ocasion aki, e representantenan di Archivo Nacional Aruba, den persona di director Raymond Hernandez, Edric Croes y Shakira Croes tabata presente pa duna un presentacion di e proyectonan innovativo cu Archivo Nacional Aruba conhuntamente cu partnernan local y internacional ta ehecutando.
Raymond Hernandez su presentacion tabata titula “Collection Aruba and the Aruba model”: A collaborative approach for preservation and access of collections in small island states.” E presentacion aki Hernandez a realisa conhuntamente cu Peter Scholing di Biblioteca Nacional Aruba, unda a duna un presentacion di e plataforma di e herencia digital cu ta un modelo pa Aruba, pero tambe un modelo cu a implementa den e otro islanan di Caribe. Esaki ta basa puramente riba e realidad Caribense di e islanan chikito y cu recursonan (placa, conocemento y experticio) limita. Hustamente door di uni forsa na un nivel nacional, por logra exitonan grandi, cu uzo di open sources. Por implementa e mesun modelo aki den Caribe.
Pa cu e parti tecnico di e plataforma digital, Edric Croes y Peter Scholing a duna un presentacion titula: “Preserving Caribbean Cultural Heritage, one puzzle piece at a time: The technical tools and strategies of the Coleccion Aruba Project”. Durante e presentacion aki, a duna un splicacion di e parti di cooperacion dentro di Aruba y cooperacion dentro di Reino di e plataforma y con e ta funciona pa e usuarionan. Tambe e parti di e open source, cu a wordo brinda por medio di e plataforma mundial di Internet Archive a haya atencion.
Shakira Croes, representando Archivo Nacional Aruba y Fundacion Amigonan di Archivo a duna un presentacion titula: “The Aruba Way – Supporting the cultural heritage of Aruba”. Durante e presentacion aki, Croes a duna un splicacion amplio di e rol y aporte cu Fundacion Amigonan di Archivo ta duna na Archivo Nacional Aruba. E proyectonan cu a wordo realisa durante e añanan y awor e sosten cu e fundacion ta nifica pa e plataforma Coleccion Aruba (coleccion.aw).
Mester anota cu e serie di informacion duna aki relaciona cu Coleccion Aruba, a wordo inicia cu presentacion di Xiomara Maduro, na e conferencia aki, unda como minister di Cultura a mustra riba e trabou cu nos institutonan manera Biblioteca Nacional, UNOCA y Archivo Nacional a bin ta haci, cu a crea cooperacion hopi mas grandi cu diferente instancianan na Aruba y pafo di Aruba, sea como partner den e sector di herencia cultural, como tambe partnernan strategico cu ta sostene e iniciativa. Un iniciativa cu ta demostrando e innovacion den era digital, liderando den cierto sentido e presencia digital di nos herencia cultural y historico den mundo.
Henter e presentacion na ACURIL tabata pa mustra cu a pesar di e realidad Caribense cu loke nos institutonan ta aden, nos na Aruba ta purba di yega na maneranan pa sostene e herencia cultural di Aruba. E meta tabata na e mes momento pa inspira otronan den region pa yega na solucionnan innovativo y creativo, mescos cu nos, y asina sostene otro por medio di cooperacion mutuo.
