Fundacion Pro Cultura Arubano ta preparando pa e Parada Cultural dia 4 di september 2022. Lilian Besselink, presidente di Fundacion Pro Cultura Arubano ta amplia.
Lilian Besselink a cuminsa na bisa cu e aña aki ta prome biaha cu nan lo manda un reina chikitin y un dama grandi pa participa, como tambe cu nan grupo, cu lo rindi homenahe na Trio Las Campiranas. Nan lo tin un grupo di baile pa e show y tambe un grupo di hende grandi unda cu nan lo celebra e fiesta cultural aki. Ainda nan tin un luga habri pa hende grandi, pero pa mucha si ta cera aki. Nan ta haya hopi peticion pa tuma dies mucha mas, pero pa esaki nan lo mester di al menos dos leidster mas. Esaki ta pa sigura cu tur mucha ta bon cuida.
Pa loke ta nan participantenan, nan baby chikitin lo ta Liesjenni Flanegien y e Dama Grandi ta den persona di Antonia Hilaria. Nan lo ta e representantenan di Fundacion Pro Cultura Arubano den e eleccion aki. Tur aña nan ta traha hopi bon den cooperacion cu Fundacion Bernadina Grovell y esaki ta e caso tambe e aña aki.
Percy Jeand’or, presidente di Fundacion Bernadina y Pro Cultura, a informa cu nan ta trahando duro pa nan mantene e cultura bibo. Locual ta importante, ta pa atrae mas hende. No ban odio hende, pero ban uni den cultura. Esun cu tin cualkier idea, ta mas cu bonbini.
Cultura di Aruba falta hopi hende. No tin mucho interes pa loke ta nos propio cultura, pero si ta gusta wak cultura di otro.
Tambe cualkier persona cu ta interesa pa bay den e grupo por yama na 640-6690 y tambe 593-5961 pa inscribi pa e grupo di hende grandi. Nan ta compaña pa banda Los Amicales. Ta pidi pa tur hende pa inscribi na cualkier otro di e gruponan cu ainda tin luga.
Rib’e atardi aki tambe a tuma luga e coronacion di nan reina chikitin, den persona di Liesjenni Flanegin cu lo representa Fundacion Pro Cultura den e eleccion di Baby Chikitin Cultural.
E parada ta tuma luga dia 4 di september pa 3:00pm y tur participante mester ta pa 1:30pm na Centro di Bario Brazil.
Nos ta cultura y cultura ta nos. Aruba ban yuda engrandece nos parada cultural.
