Ya ta un aña caba. Esey ta loke e musiconan ta manda bisa gobierno y Crisis Team den un video, mustrando nan cu nan tambe ta conta.
Awo e pregunta ta keda cuanto mas nan tin cu warda. E video ta un compilacion di varios musico, miembro di Aruba Entertainment, cu tin musica como nan trabao y pa motibo di e crisis di e pandemia, awe ta sin trabao.
Actualmente bandanan no por toca y establecimentonan ta mantene entretenimento solamente na un musico y riba tono abao.
Musiconan ta sumamente preocupa pasobra nan tambe tin nan gastonan di tur dia y ta depende di nan tocanan pa por sobrevivi.
Entre esunnan cu a graba un mensahe na e gobernantenan, a nota algun cantante conoci, DJnan pero tambe otronan cu no ta riba frontline pero si cu ta traha sea directo como indirecto den e industria di entretenimiento. Ta nan tur ta sufriendo door di e medida di Gabinete Wever-Croes, den cual ta prohibi nan trahamento y consecuentemente obstaculisa nan entrada.
