Farandula tabata falta hopi atencion riba nos isla y como e media di mas grandi riba nos isla, nos a sinti nos yama pa promociona y sostene mas cu por, cada talento cu ta trece nan arte dilanti. No solamente local pero tambe den region como rond mundo.
![](https://24ora.com/wp-content/uploads/2023/08/afro4.png)
Den un entrevista cu talento nobo, Jeferson Clerge conoci den mundo artistico como JRalph, a logra haya sa un poco mas na kico e ta dedica y con ta bayendo cu su carera. JRalph tabata entre varios artista invita na evento Windsong Festival, cu a tuma luga na Batata Beach Bar na Cura Cabay.
JRalph a conta cu en berdad e ta basta nobo den e mundo artistico y cu ta aprecia cada oportunidad cu e haya pa duna presentacion y demostra su talento hunto cu su banda.
![](https://24ora.com/wp-content/uploads/2023/08/afro6.png)
![](https://24ora.com/wp-content/uploads/2023/08/afro5.png)
![](https://24ora.com/wp-content/uploads/2023/08/afro3.png)
Nan forma y inclinacion ta mas estilo di un fusion Afro Caribense, combina cu soca y poco compa di Haiti pa asina yega na un ritmo contagioso y unico. JRalp a conta alabes cu no ta solamente Papiamento ta bin dilanti den su repertorio pero tambe idioma Creole Frances y masha poco un tiki den idioma Spaño.
Manera mayoria di e generacion nobo di artista hoben, nan produccion ta bin dilanti riba plataforma diferente manera Spotify, YouTube, Apple Music of pa mas facil via e link riba Instagram cu lo hiba e usuario na cada plataforma, caminda por disfruta di e temanan disponibel.
Cada artista ta traha duro pa asina gana e curason y apoyo di e publico, esaki sigur no tabata falta cerca JRalph. Ademas di presentacion en bibo, acompaña pa su banda, por a tuma nota di diferente produccion di video cu tambe e tin riba su nomber caba.
Popularidad creciente ta brinda mas oportunidad di presentacion y ta locual cu ta yegando mas y mas. Pronto e lo forma parti di otro festival di musica Afro Caribense y sigur lo sa di bin cu un tremendo repertorio.
![](https://24ora.com/wp-content/uploads/2023/08/afro2.png)
![](https://24ora.com/wp-content/uploads/2023/08/afro.png)