Mama di tres, Kirsty Bortoft, biba na Scarborough, North Yorkshire, a shock mundo medico y sernan keri ora di comparti su experiencia extraordinario despues cu e tabata morto pa 40 minuut y keda resucita. E dama di 49 aña di edad ta un Emotional Coach, el a bay den un coma despues di a sufri un atake di curason na su cas riba 29 di januari 2021.
Segun su pareha Stu, nan a haya Kirsty practicamente sin bida riba e sofa cu su wowonan ful habri. Doctornan a logra na resucita e dama despues di 40 minuut, pero su regreso na bida a trece cu ne un revelacion unico.
Durante su tempo cortico den e bida despues di morto, Kirsty ta bisa cu el a haya un experiencia magico cual a dun’e un comprension mas amplio awo di bida. Den su propio palabranan, e ta bisa cu “ningun hende e tempo ey tabata sa kico tabata pasando apesar di mi famia, pero mi amiga a tuma contacto cu mi ruman muhe y puntr’e kico tabata pasando.”
Kirsty ta conta cu su spirito tabata presente den e sala di su amiga, na unda cu el a pidi pa skirbi algun nota pa su yiunan y su tata. Kirsty ta bisa cu e tabata consciente pafo di su curpa, cu informacion detaya riba su situacion.
“Mi ta corda ora cu mi finalmente a regresa bek na mi curpa, mi tabata sa exactamente kico mi mester a haci pa mi bira bon bek, mi a haya un download di informacion. Mi a realisa cu bo no ta muri, bo curpa ta sigui bay, y cu mi mision aki riba tera ainda no ta cla.”
E dama ta bisa cu su recuperacion rapido ta danki na meditacion. Despues di dies dia, e estudionan haci riba dje a revela cu su pulmonnan tabata hopi mas miho na unda cu e cicatriz a practicamente disparce.
Kirsty a destaca tambe e rol crucial di e comunidad den su regreso bek na bida. Amigonan, gruponan di meditacion y hendenan rond mundo a uni den oracion y meditacion pa su recuperacion.
