Awe den oranan di marduga polis mester a atende cu un caso di un señora cu tabata haci fastioso. Y tur esaki pa motibo cu e tabata bou influencia di alcohol. Na final en bes di bay subi cama drumi, el a finalisa na warda di polis.
Tabata rond di 2:40am cu un patruya a acudi na un cas na Bubali. Na e sitio a tuma nota cu un señora den un Nissan Sentra A-25793 tabata haci basta desordo cu su auto den e bario di Bubali y no tabata laga bisiñanan drumi.
Polis a papia cu ne na un forma nechi pa e hiba e auto bek na e cas y e persona bay paden. Pero den e proceso ey el a dicidi pa no sigui e ordo y riba dje a cuminsa insulta polis. No a keda nada otro cu detene y transporte pa warda mirando cu e ta burachi y a insulta e polisnan.
