Maestronan di e scol basico Colegio Ora Ubao a bin cu un iniciativa creativo door di cual a recauda fondo pa yuda e refugiadonan di guera na Ucrania. Alumnonan di e scol den districto di Tanki Leendert a traha y bende pintura y obra di man di un girasol na prijs di apenas 1 florin pa cada un.
E meta tras di e accion aki tabata, na prome luga, pa conscientisa e muchanan riba loke ta pasando na Ucrania y pa nan por desaroya un sinti di comprension y empatia pa cu nan prohimo.
Na final di e actividad aki, a logra recauda un suma di 715 florin (365 euro), cu e scol a transferi pa e cuenta di Giro555. Giro555 ta consisti di diferente organisacion di ayudo cu ta reconoci door di gobierno di Hulanda.
E flor di girasol, zonnebloem of sunflower ta e flor nacional di e pais. Adicionalmente, Ucrania ta produci casi mita di e azeta di girasol na mundo. E guera cu Rusia a hiba na un escasez global cu ta aumenta prijs di cuminda. Esaki no a stop e cunukeronan di Ucrania di sigui cultiva e flor y produci e azeta.
Por ultimo, Colegio Ora Ubao kier gradici tur persona cu a aporta door di cumpra girasol cerca e muchanan y ta spera di por inspira otro nan tambe cu e actividad aki.
