Minister Geoffrey Wever a bay acompaña cu ex minister Andin Bikker. Andin Bikker awendia ta consehero di minister di Salud Dangui Oduber. Netamente a bay Colombia pa atende e asunto di carni pa Aruba procedente di Colombia. Nan a atende un reunion importante tambe cu e minister encarga cu asuntonan di carni na Colombia. Pa nos ta importante pa sa con a bay cu e reunion cu minister Geoffrey Wever y Andin Bikker a atende riba e tematica di carni. Mester remarca si cu e problema cu carni di Colombia no ta yega Aruba ta un problema di gobierno di Aruba mes. Segun minister Geoffrey Wever e esfuersonan di gobierno ta pa haci tur empeño pa importa carni for di Colombia. Kier trece producto mas atractivo pa su ciudadanonan.
Nan sa cu costo di bida ta halto y nan kier baha e costo di bida pa nos hendenan di Aruba. Tambe minister Geoffrey Wever a splica cu baha costo di bida ta algo cu ta biba den gobierno. Den e caso aki minister Dangui Oduber a manda dos consehero pa join e mision. A adresa e punto di importacion di carni den e reunionnan cu tabata tin. E reunion cu Grupo Pro Colombia cu Vice Ministro di Comercio tabata uno fructifero riba e tema di carni segun minister Geoffrey Wever. Ta trahando awo pa firma un protocol sanitario. Lo toca e tema aki ora di atende e parti di logistica pa asina mira con of den ki forma por trece mas producto pa Aruba. E asunto di carni di Colombia pa Aruba ta halto riba agenda di gobierno. Entre e demas ministernan tin consensus caba cu nan kier esaki. Minister Geoffrey Wever ta spera cu pronto nan tin noticia positivo. Mirando e forma cu autoridad Colombiano ta reacciona ta mustra cu e ta posibel. Nan tambe tin tarea pa haci segun minister Geoffrey Wever. Nan lo haci nan parti na Aruba y bin bek cerca autoridad Colombiano pa mira con esaki mester wordo implementa. A mustra minister Geoffrey Wever cu na Corsou e carni di Colombia tey masha tempo.
No mester inventa e wiel. A mustra e mandatario cu ta den mesun reino nos ta. Minister Geoffrey Wever a splica cu den pasado Aruba tabata haña carni di Colombia y na dado momento a bin un decision politico cu e tempo ey kizas tabata un decision responsabel. No a bay den e detaye ey y a stop e posibilidad di importa carni. E gobierno aki lo bay atende e tema y haci nan best pa importe. Tin cierto exigencia cu nos como pais mester cumpli cu ne. Nos tin obligacion pa garantisa calidad y percura cu e transporte ta posibel. Minister no ta kere cu e mester ta algo imposibel. Mester tin boluntad politico y dor cu su persona y minister di salud ta pro, a hinca esaki den agenda pa purba logra esaki. Fecha no tin ainda y despues di algun reunion na Colombia cu Douane ainda etc, lo atende esaki na Aruba y mira con precisamente lo bay haci’e. E bon ta cu tin sosten di autoridad Colombiano pa haci esaki finalmente.
