Diasabra 9 di september e Modelo special Kaythairy Richardson cu nomber di cariño Kay di “Sea Bunita Sea Bo Mes” a sali ariba e pantaya gigantesco (billboard) den Time Square New York. Esaki a wordo estrena mientras cu miles di persona por a wak e evento aki cu National Down Syndrome Society (NDSS) a organisa riba Time Square na New York pa 2023.
Anualmente NDSS ta recorda riba e “cariño special” cu personanan cu Down Syndrome ta lanta den nos Comunidad.
Durante un presentacion riba e bilboard den Time Square na New York, a presenta 500 persona cu ta consisti di mucha te cu adulto cu tin Down Syndrome.
E video mas bien ta un forma di recorda y contribui logro y balor cu personanan cu Down Syndrome tin den nos comunidad. E meta di NDSS ta pa crea conscientisacion, aceptacion y inclusion pa e personanan cu tin Down Syndrome.
Diasabra masha hopi famia a bin for di tur skina di mundo y a topa na New York pa participa den diferente evento organisa pa NDSS. Despues di mustra e video riba Time Square tur participante a asisti na diferente evento cu e organisacion a presenta.
Tabata tin entre otro un ceremonia di apertura, un fiesta pa entrega di premio. A transmiti tur esaki virtualmente na mas cu 150 ciudad na Merca y tambe na diferente parti di mundo unda mas di 325 mil persona a conecta via di internet.
Esaki ta un otro evenemento cu NDSS cu e fundacion local ta forma parti, a logra organisa, caminda Kaythairy Richardson di Aruba y tur otro persona cu Down Syndrome por a participa. Esaki sigur ta un tremendo logro pa nos dushi isla Aruba.
