Minister di Transporte, Integridad, Naturalesa y Asuntonan di Adulto Mayor, Ursell Arends ta bisa cu ora kier bay papia di Raft, e ta haya cu no por solamente hiba e 15% di debe cu Aruba tin cu Hulanda, pero tin cu hiba e debe den su totalidad. E mandatario ta haya cu mester percura pa ningun gobierno mas malgasta placa den futuro.
“Si nos kier saca un man pa yuda pueblo di Aruba, nos tin cu atende cu e debe externo pasobra anualmente nos ta pagando mas di 250 miyon di interes na debe externo,” e mandatario ta enfatisa. E ta sigui na bisa cu si nos por haya esaki na un interes preferencial, negocia esaki na un miho acuerdo pa Aruba cu ta inclui esaki tambe, e ora ey e mandatario ta haya cu e lo beneficia Aruba den su totalidad.
‘Supervision no por reemplasa gobernacion’
Esey ta e posicion cu a wordo vocifera segun Minister Arends tanto como gobernante y plataforma cu e ta lidera esey den parlamento. Nos a puntra e mandatario si e ta dispuesto pa bay Hulanda tambe pa yuda den negociacionnan, di cual el a contesta cu el a sinta hunto na mesa den combersacion cu minister president, minister di finansas y di economia. “Nos a sinta hunto den e ultimo negociacionnan, y nos lo forma parti di e proximo negociacionnan pa asina ki logra haya e miho acuerdo pa Aruba,” segun Minister Arends.
Sin embargo, comercio, manera tambe por wordo sinti den comunidad tog wel un preferencia den algo asina mirando con a malgasta placa anteriormente. Minister Arends: “Nos tin cu garantisa pa esey no pasa mas den futuro.” E mandatario ta haya cu mester bin cu supervision, no ta contra supervision pero e minister ta enfatisa cu supervision no por reemplasa gobernacion. Miembronan di parlamento ta wordo escohi por medio di pueblo pa representa nan, y minister Arends ta haya cu supervision no por
bay bira un forma di gobernacion. “Esey ta mi opinion, y mi ta keda para tras di esaki tambe.”
