Na Aruba nos tin un problema grandi di cacho y pushi riba caya. Na 2019 a anuncia cu a bini cu un plan nacional pa atende cu e reto. A realisa varios punto den e plan di accionnan cu mester a tuma luga inmediatamente. Mirando cu a actualisa e Plan Nacional 2019 y mirando tambe cu nunca a publica e plan mes, awe ta presenta e plan actualisa como e National Plan for Stray Animals (NPSA 2021).
E problema ta grandi pasobra berdad nos tin doño di mascota responsabel pero nos tin demasiado doño iresponsabel cu no ta atende debidamente cu nan mascotanan. Tuma un mascota ta rekeri un responsabilidad di bo banda pa resto di su bida of te dia bo haya un doño nobo p’e.
E responsabilidad ta encera cuido y cariño necesario di bo pa bo mascota y tambe pa tur e criaturanan cu el a (yuda) trece na mundo mientras bo no a haya doño pa nan. Si bo no ta desea e criaturanan, e responsabilidad ta encera cu bo mester sterilisa bo mascota tambe. “Ta doño di un mascota ta un privilegio y nunca lo mester experiencie como un molester”, Minister Ursell Arends kende ta encarga cu Dierenwelzijn a comenta. “Bo mascota mester realmente forma parti di bo famia y na Aruba no ta tur hende ta wak e asina. Ta mira hopi cacho ainda como un alarma pa cuida cas y no como parti di famia.”
Dos (2) cacho por multiplica pa 68,000 den seis (6) aña. Dos (2) pushi por multiplica pa 11 miyon den seis (6) aña. E problema di pushi – compara cu esun di Boa – ta uno mucho mas dañino pa e estado di fauna di Aruba, specialmente pa parha y otro animalnan nativo. E ta un problema cu no ta directamente den bista di tur, pero si uno cu mester ser atendi cu ne pa e bienestar di e medio ambiente di Aruba. National Plan for Stray Animals ta un stap pa por cuminsa atende cu esaki tambe.
Locual por spera pronto como parti di NPSA ta implementacion di un campaña di conscientisacion tocante nos Ley di Cacho, acompaña pa un campaña agresivo di microchip. Lo ekipa e Dog Control Unit miho pa por atende cu e cachonan cu no ta wordo teni den nan cura manera cu Ley di Cacho ta stipula.
Lesa mas di NPSA via e siguiente link: https://bit.ly/38pE3r7
