Minister di Husticia y Asuntonan Social, Rocco Tjon ta bisa di ta sumamente satisfecho di por a finalisa e reorganisacion di departamento di Inmigracion Aruba. Den dos aña cu e Minister di Husticia ta den posicion el a logra finalisa e reorganisacion di KIA, tambe di CEA y Korps Politie si tur cos ta bon pa e aña aki tambe e formatie rapport definitivo lo keda cla segun e mandatario.
E ta imporante pa haci esaki pa motibo cu e ta haci e organisacion uno dinamico cu e por cumpli cu demanda cu ta bin riba dje y pa loke ta trata husticia esaki ta hopi importante. “Na mes momento e ta reglamenta e posicion huridico di cada trahado”, Minister Tjon a expresa. E mandatario ta enfatisa cu esaki ta importante pa nan haya loke nan tin derecho riba dje, brindando nan un perspectiva mucho mas grandi hunto cu un liña di carera hopi mas largo. “E ta un momento hopi importante”, el a comenta.
A puntra e minister con bin si varios otro ministerio di husticia den pasado no por a logra yega na esaki, e ministerio aki si por a logr’e asina lihe: “Ta pa e colaboracion cu tin”, segun e mandatario ta contesta nos ora di a puntr’e con bin nan si a logra esaki relativamente rapido. “Ta e colaboracion entre ministerio cu e departamentonan, pero hopi importante tambe cu e sindicatonan y cu departamento di recurso humano.”
FONDO PA RECLUTA MAS PERSONAL
E prome organisacion cu a laga cuminsa mesora cu un clase nobo tabata Inmigracion Aruba. Esey ta alivia e peso cu tin den e organisacion. Pero pa loke ta trata presupuesto 2024, e ministerio ta laga sa cu nan a percura pa un fondo (Groei fonds) caminda lo por recluta personal pa ful e cadena hudicial. “Y obviamente unabes cu presupuesto 2024 ta aproba, cual nos ta trata na november si tur cos ta bon, otro aña mesora lo por recluta personal entre otro pa departamento di Inmigracion Aruba.” E prome cara cu e bishitante ta wak ora di yega Aruba ta esun di Inmigracion, pues ta hopi importante pa tin suficiente personal pa e fluho – unabes e bishitante yega Aruba – por ta uno lihe y un experiencia agradabel pa nan.
NO TA KERE DEN ‘MANAGEMENT TEAMS’
Personalmente, minister Tjon su filosofia ta cu e ta kere cu den departamentonan hudicial bo mester tin un persona na cabes cu por tuma decision. “Y pa e personal sa tambe ken ta encarga cu e liderazgo di e organisacion ey. Y p’esey personalmente mi no ta un fanatico di team di maneho.” Sinembargo, hopi biaha, segun e mandatario, door di circumstancianan bo ta haya bo obliga pa pone un team di maneho temporario. Minister Tjon a finalisa bisando: “Pero p’esey mi ta haya importante cu e finalisacion di e reorganisacion aki nos por a nombra Andrew Hoo awe tambe definitivamente den e funcion di director di e organisacion aki.”
