Riba e caso lamentabel di e hoben cu a fayece na Paseo Herencia riba dia 17 di october, minister Rocco Tjon, encarga cu e cartera di husticia y asunto social, tabata breve durante e conferencia di prensa diahuebs.
El a adres’e pasobra tin hopi pregunta riba dje y a agrega cu recherche di districto di Noord ta den pleno investigacion riba esaki.
Tin un team dedica na e investigacion aki. No por a elabora mucho pero si e minister a bisa cu e investigacion ta andando. Tur informacion riba e caso aki por presenta via e tiplijn cu ta 11141. Asina ey e informacion lo por contribui pa por haya sa kico realmente a sosode. Di e forma ey tambe trece un clausura p’e famianan.
ADMISION DI FAMIA
Famia di e hoben for di Venezuela a haya permiso pa drenta Aruba, pa asina nan por presencia e entiero. E peticion aki no solamente a drenta na despacho di e ministerio di husticia, pero tambe n’esun di integracion bao encargo di minister Glenbert Croes.
Tin contacto cu e famianan na Venezuela y a facilita henter e proceso pa nan por bin Aruba y presencia e entiero, brindando asina e tempo necesario pa nan por rouw.
Obviamente nan lo regresa nan pais bek. Pero di parti di e ministerio di husticia y asunto social, ta den contacto cu e famia y a facilita e proceso aki pa nan por ta presente den e momentonan dificil aki pa loke ta e famia.
