Un rato pasa famia Wever-Croes a yega Aruba for di Miami, cu vuelo di American Airlines. Departamento di protocol di Gobierno y Polis a busca nan na avion y pasa nan pa VIP-Room y despues saca nan den banda hinca nan den auto wardando nan pa bay cas. E prome mandatario tabata sinta den auto caba y no a desea di duna ningun comentario.
Minister Presidente a tene un discurso nacional siman pasa, sin anuncia na pueblo cu su mañan mainta e ta sali pa Merca pa pasa vakantie escolar cu henter famia. E detaye ey no a cay den bon tera cerca mayoria riba nos isla. No ta cu como prome mandatario por bay cu vakantie, sino e timing, memey di varios crisis, a lanta bela bay Orlando lagando e pais atras den abismo.
Riba dje, e yiunan publica videonan riba red social mustrando con bon nan ta pasando den parke na Orlando, incluyendo imagennan den coney island den cual ta los un variedad di palabra malo riba red social. A publica con e amigo ta cay flauw mas di un biaha, te lanta bek, mientras ta den e “ride” cu ta subi-baha riba velocidad maximo. Den un solo palabra…un vakantie “tur afo” memey di pandemia, miseria y sin por ainda yega na acuerdo cu Hulanda riba con e pais aki lo sigui padilanti otro aña.
Y comosifuera poco, diabierna anochi e Minister Presidente, sinta ta warda yiu y nieto den park, a opta pa ordena e pueblo di Aruba pa keda cas y no sali riba caya pasobra corda tin mas di 400 caso activo di Covid ainda na Aruba. E publicacion ey a haci masha daño mes y a causa un avalancha di critica riba su mesun Facebook pa cual e mes a dicidi di kit’e. Asina mes e publicacion a core riba whatsapp, condenando e forma con ta conseha pa no haci algo cu e mes ta haciendo den un di e estadonan cu mas contagio na Merca!
Un rato pasa Minister Presidente a yega bek despues di un siman di gosa y alegria cu su casa, yiunan, pareha di e yiunan y nieto for di Orlando, Florida. Si tur cos ta bon, dialuna e lo cuminsa traha atrobe. Durante su siman di vakantie, Minister Andin Bikker a ocupa e funcion di Minister Presidente interino.
