Durante conferencia di prensa Prome Minister mr. Evelyn Wever-Croes a anuncia di su biahe pa Hulanda hunto cu Minister di Finansas y Cultura mr. Xiomara Maduro. Otro siman nan tin diferente bishita y reunion na Hulanda pa atende tema di recuperacion di Aruba.
Segun prome minister, nan ta bay presenta con Aruba ta recuperando. Aruba tabata un di e paisnan cu tabata mas fuerte afecta y IMF mes tabata un di nan cu a publica di esey. Na mes momento Aruba ta un di e paisnan cu mas lihe ta recuperando den region. Meta di tur bishita y reunion ta pa presenta e plan di recuperacion di Aruba y mira unda Hulanda por yuda cu esaki por bay mas lihe.
Aña 2023 ta proyecta cu e asuntonan di mas grandi cu ta causa discusion entre Hulanda y Aruba a atende cu nan. Nan ta tres palabracion cu e actual gobierno a palabra cu nan na 2018. A palabra cu ta bay yega na un surplus y a yeg’e na 2019, pero na 2020 no a concretis’e door dje pandemia. E otro palabracion tabata e gasto personal cu ta sigui baha, segun e mandatario.
E di tres palabracion ainda gobierno no por cumpli cu ne y esey ta e quota di debe di GDP. A palabra na 2018 cu pa 2037 tin cu yega 50% dje GDP. Cu e debe gigantesco di Covid, e 916 miyon presta di Hulanda ta pone cu sin mas no por yega na e meta ey.
