Un preocupacion grandi cerca e comerciantenan ta e introduccion di BBO aan de grens, cu ta hopi relevante actualmente. Esaki lo mester drenta na vigor otro siman, prome di juni.
Pa e comerciantenan, nan ta sinti cu nan no a haya mucho informacion y Minister di Finansa, mr. Xiomara Maduro tampoco no ta dunando e comerciantenan atencion. Prome Minister, mr. Evelyn Wever-Croes riba e tema aki a bisa cu e BBO aan de grens tabata netamente un idea di e comerciantenan. Su persona tabata den e reunion hunto cu nan, unda cu mester a tuma e decision aña pasa si ta bin BTW of no. pero e comerciantenan a prefera di hisa e BBO y bin c’un BBO aan de grens.
E mandatario a enfatisa cu lo no para e BBO aan de grens y cu Minister di finansa lo ta finalisando e ultimo detayenan relaciona cu e introduccion di BBO aan de grens. El a sigui bisa cu e siman aki ainda Minister di finansa lo tene un encuentro cu prensa pa asina duna mas informacion pa loke ta e BBO aan de grens y su introduccion; el a nenga cu lo stop su introducion.
Minister-President a bisa tambe cu tanto Minister di Finansa como Minister di Economia ta den contacto cu gremio comercial, pa splica nan kico ta e posicion di Gobierno. Tambe el a indica cu e sistema di BBO aan de grens ta un sistema relativamente facil y cu e no ta wak un problema den esey.
PROME DI JUNI
Informacion adicional cu nos di 24ora.com a ricibi ta indica cu e posibilidad di introduci BBO aan de grens pa e fecha prome di juni ta uno casi imposibel. Esaki ta en bista di cu mayoria parlamentario ta den exterior pa e reunionnan di Parlatino y otro siman lo tuma luga e reunionnan relaciona cu IPKO na Hulanda.
E tempo a trata e ley aki den Parlamento y pa e cana su proceso, ta no existente.
