Minister-president Evelyn Wever-Croes ayera 25 di juli a haci un bishita na Arubahuis. Minister Plenipotenciario Suplente mr. Ady Thijsen, directora a.i. di Arubahuis drs. Glenda Hernandez y personal di Arubahuis a ricibi Minister Wever-Croes.
Durante di su bishita premier Wever-Croes tabatin un combersacion cu Minister Plenipotenciario Suplente mr. Ady Thijsen y directora a.i. di Arubahuis drs. Glenda Hernandez. Despues Wever-Croes a tene un reunion cu e personal di Arubahuis. Premier Wever-Croes a papia riba e situacion actual na Aruba; con e isla ta recuperando di e pandemia. Tambe Wever-Croes a bisa cu Gobierno ta inventarisando e rol cu Arubahuis lo mester hunga awor y den futuro.
E mandatario a bisa di ta contento pa mira Arubahuis den su localidad nobo y temporal. Segun premier Wever-Croes awor ta bay start e procedura pa loke ta trata e edificio di Arubahuis. E siguiente paso ta pa bin un “bouw technisch onderzoek” pa determina kico lo mester pasa cu e edificio.
Minister-president a puntra con ta bayendo cu e preparacion pa e yegada di e studiantenan y e cuestion di vivienda. Funcionario di Onderwijszaken di Arubahuis Ivonne Navas a duna un briefing na MP di e situacion actual.
Na final premier Wever-Croes a gradici e personal pa e reunion ameno y pa e informacion brinda na su persona.
Despues minister-president Wever-Croes tabatin un reunion cu representantenan di PWC y tambe tabatin un encuentro cu presidente di Caft Raymond Gradus.
