Diaranson 2 di februari a sali un relato den Volkskrant di un medico cu a duna su experiencia trahando cu pashent aki na Aruba. E medico a comenta di por nota e problematica di obesidad cu tin na Aruba y cu gobierno su plan di prevencion pa cu esaki.
Mirando cu e causanan di obesidad ta varios y cu tin cu combati esaki for di diferente angulo, Minister di Turismo y Salud Publico Dangui Oduber conhunto cu Departamento di Salud Publico tin diferente plan coordina cu e expertonan den e area por ehempel e NCD (non-communicable diseases) stuurgroep. Un di e programanan di intervencion lo tin e meta netamente pa asisti personanan cu tin riesgo halto di malesa cronico a causa di sobrepeso y obesidad y pa preveni esaki.
Den otro area di prevencion, actualmente Departamento di Salud Publico conhuntamente cu Ministerio di Salud Publico, tin plan cu ta encera otro campañanan di informacion y programanan dedica na movecion y nutricion saludabel den colaboracion cu Ibisa.
Ta trahando tambe riba un clinica di prevencion cu e meta pa asisti esnan cu problema di sobrepeso pa hiba un bida mas saludabel. E clinica aki ta parti di un campaña integral dirigi ariba plannan nacional di prevencion di NCDs cu ta inclui obesitas, na unda lo enfoca rriba movecion y nutricion saludabel.
Y asina tin diferente proyecto mas na caminda of den ehecucion cu ta sali for di Plan Nacional di Prevencion cu a inicia na 2020 y ta keda vigente te cu 2030.
E dokter por a opta pa na hopi otro manera vocifera su preocupacion referente e tema respetando tur hende cu tin problema cu sobrepeso.
Aruba ta un comunidad chikito cu un cultura rico na tradicion vooral den area di cuminda. E cambio cu Minister di Salud kier trese ta pa respeta e cultura rubiano pero reinforsa e parti di educacion y informacion riba terreno di salud (cu enfoke ariba nutricion y movecion) duna na e comunidad. E vision di Minister Dangui Oduber ta pa informa, educa y asina empodera e comunidad pa asina por hasi un escohencia saludabel y bon balansa.
