Durante e conferencia di prensa di gobierno dialuna mainta minister di salubridad publico a anuncia algun aspecto importante di e vacuna contra COVID-19 cu ta programa pa yega Aruba dia 15 di februari y cuminsa mesora cu e proceso di vacunacion.
Na caminda pa esaki, minister Dangui Oduber a splica, ta cuminsa un campaña intenso riba e vacuna. Ta papia aki di cual ta e vacuna, cual ta su side-effectnan, etc. Hunto cu e campaña ta bay lansa e slogan, pa encurasha mas tanto hende posibel tuma e vacuna (cu no ta obligatorio). E slogan di e campaña ta “Vacuna, protege bo mes pa hunto nos por progresa”. Gobierno ta stimula tur hende pa tuma e vacuna pa como pais por sigui riba e caminda di progreso, pa un y tur,” minister Oduber a bisa dialuna mainta.
El a splica cu nan ta spera cu den e prome badge haya un cantidad mas grandi posibel di e vacuna. Hulanda a bisa cu den e prome kwartaal nan ta bay haya 3 miyon vacuna for di dos compania farmaceutico (Pfizer / Biotech y esun di Moderna). E ta kere cu Hulanda lo manda mas tanto vacuna posibel den e prome badge, compara cu e otronan despues. Sinembargo e ta spera cu Hulanda tene na consideracion cu e islanan aki ta hopi vulnerabel pa e consecuencianan economico cu COVID-19 ta trece cu ne.
A parti Aruba den 7 grupo, cuminsando prome cu algun seccion di cuido y esnan mas vulnerabel cu ta un grupo di casi 6 mil persona (B ta e grupo mas grandi den e dosnan aki) pa cual lo mester sigur rond di 10 mil vacuna, ya cu e vacunacion ta consisti di dos dosis.
E di tres vacuna Astra-Zeneka ta na punto di haya aprobacion for di autoridadnan concerni y momento cu esaki sosode, e lo bira un vacuna hopi mas facil pa almacena cu e otro dosnan.
