Diabierna merdia Minister di Turismo y Salud Publico a acudi na Colegio Bon Bini den Apollostraat caminda e mandatario a ricibi un homenahe hunto cu e frontlinernan, sigui pa un fiesta carnavalesco hunto cu e muchanan. E tabata un rato masha alegre caminda e mandatario a gradici e frontlinernan. Minister Oduber a comparti cu e muchanan, cu e tambe a bishita e Colegio Bon Bini tempo e tabata mucha.
E frontlinernan presente cu a ricibi homenahe tabata entre otro representante di Bureau Rampenbestrijding, DVG, Polis, Ambulance, ImSan y HOH. Minister a menciona cu e trabou cu a haci durante e pandemia tabata un trabou duro y den ekipo. E mandatario a menciona cu e frontlinernan a yuda scapa hopi bida. El a duna palabra di danki pa tur sacrificio y amor brinda na nan trabou. Awe, Aruba a sali di e pandemia y sin duda esaki ta danki na e frontlinernan.
Minister Oduber a bisa e muchanan cu; nan ta e futuro di mañan. Pa nan haci nan best na scol, pa dia di mañan nan tin un bon trabou mescos cu nos frontliner.
