Tur dia bay ta drentando mas peticion na Dienst Openbare Werken (DOW) pa laga traha verkeersplateau/drempel den diferente bario. Ta un forma pa garantisa mas siguridad den trafico pasobra automobilistanan ta haya nan ta reduci velocidad, specialmente den areanan habita. E weekend aki DOW a traha un verkeersplateau den Mandolinstraat, na Dakota.
Ta intencion di Minister Marisol Lopez-Tromp, den cuadro di garantisa mas siguridad den trafico, pa percura pa e infrastructura aki ta presente den barionan cu haci peticion pa un. Hopi biaha tin muchanan ta biba den e barionan aki, cu sa hunga pafo, pero cu autonan ta keda core duro den e area. Door di instala e tipo di plataformanan asina memey caminda, ta yuda pa automobilistanan brake completo y asina kibra e velocidad.
Den pasado tabata paga companianan priva pa traha e plataformanan aki pero cu tempo DOW mes a tuma e tarea aki over y cu placer nan ta construi nan pa e pueblo. Si abo tambe ta desea un verkeersplateau den bo bario, busca firma di bisiñanan y entrega un peticion por escrito na DOW.
