Despues di discusion na cas: Dama a sali bolter cu auto

Awe nochi pa 8:40pm a sosode un accidente den Caya Apolonio Werleman na Cas Ariba den Santa Cruz. Un auto marca Nissan, modelo March, color preto, numera A-11937 a perde control y bolter.

Motibo di esaki ta cu e dama cu tawata stuur e March a caba di sali for di su cas despues di un discucion cu su casa. Y ta precisamente den un momento di rabia, e no a paga tino na con e ta stuur y a subi na banda, cu consecuencia cu e auto a slip riba e santo band’i caminda y e auto a perde control. Ni maske e dama a purba controla e stuur, toch e auto a bolter den e bocht di caya Apolonio Werleman na Cas Ariba.

Ambulance a presenta na e sitio di accidente pa check condicion di e chauffeur pero no tabata necesario pa transport’e pa Hospital. Na e sitio mes a atende cu ne. Polis di trafico a presenta na e sitio pa por haci un investigacion hunto cu Forensys. Cu takelwagen a hiba e auto cas despues di e accidente.