Na 2018 ta cumpli 30 aña cu na Aruba e idea a keda introdusi di independiza educacion publico. Ta Gabinete di Henny Eman I a bin pa prome biaha cu e pensamento aki.
E rapport Stuurgroep Herstructurering Onderwijs (SHO) cu tin como titulo “Renovacion di enseñansa: prioridad pa futuro” di 1988 ta propone “apart openbaar schoolbestuur in het leven te roepen” (pag. 86). Ke men ta partido AVP a lanza e idea aki. Arthur Dowers, Marlon Sneek, parlamentarionan di AVP, awe ta critica independizacion di educacion publico, pero ta nan partido a bin cu ne. Hende ta lubida pa conveniencia politico.
Casi 10 aña despues na februari 1997 Gabinete Eman III pa medio di su Minister di Educacion a bolbe pidi un apart openbaar schoolbestuur, un nota scirbi tempo Baba Herde tabata consehero principal di educacion. Awe Baba Herde ta critica independendizacion di educacion publico y ta lubida loke su team mes a produsi na 1997. Hende ta lubida of no por corda. Despues na juni 2004 bao di Gabinete Oduber IV e Minister di Educacion di e tempo ey, Marisol Lopez Tromp, a pidi pa bin no solamente cu DPS sino tambe cu un Openbaar schoolbestuur den un di dos fase. Edgard Vrolijk, Sue Ann Ras, y otro parlamentarionan di MEP por busca informacion den nan mesun seno ya cu ta nan partido MEP a boga pa esaki na 2004 caba.
Si Aruba ta bezig caba cu e idea aki di independendizacion di educacion publico pa 30 aña largo, ke men no por verwacht awor di Minister di Educacion pa realiza esaki den tres luna. Nos lo bai paso pa paso. E prome paso den cuadro di independizacion di educacion publico lo ta consulta riba un posibel Stichting EPI. EPI cu ta e scol mas grandi na Aruba actualmente, mes a hasi e peticion pa independiza EPI mirando e ventahanan cu esaki lo tin pa EPI. E forma aki lo permiti EPI capta fondonan cuantioso cu na e momentonan aki huridicamente no ta posibel. Y e posicion huridico di tur maestro lo keda mescos. E otro paso den un futuro mas lejano lo ta e independizacion di otro scolnan publico. Asina lo duna mas tempo pa informa tur maestro kiko ke men independizacion di educacion publico, mirando cu na e momentonan aki tin hopi confusion y informacion incorecto cu ta circula. Ta nos deber pa educa tur maestro debidamente riba e topico aki y asina tur maestro por eherce nan profesion den tur trankilidad.
