Desde augustus 2019 cu Bureau Traimerdia ta resorta bou di Minister Glenbert Croes. For di e tempo ey a bin ta traha incansablemente riba mehoracion y ampliacion di servicio di Traimerdia.
E instancia aki ta cardinal pa cuido y siguridad di nos muchanan. Traimerdia ta duna guia y ‘opvang’ na hopi mucha na Aruba. Tempo cu el a bin resorta bou di Ministerio di Asunto Social y Labor tabatin un lista di espera 500+. A reduci esaki na 197 mucha sperando un cupo.
Si na augustus 2019 Traimerdia tabata atende alrededor di 1100mucha, pa e aña escolar 2020/2021 Traimerdia a amplia su infrastructura ofreciendo cuido y guia na mas o menos 1400 mucha. Di un total di 43 klas, a amplia e localidadnan na 68 klas. E meta ta pa por ofrece cuido y guia na tur e muchanan cu ta desea di atende Traimerdia. Minister Glenbert Croes su meta ta pa ningun mucha keda atras. Su meta ta, pa di parti di Gobierno, ofrece tur alternativa posibel cu ta ofrece siguridad na nos muchanan.
Desde 16 di augustus 2019 pa awo Bureau Traimerdia a conoce e siguiente avancenan:
• Traslado di e scolnan di SKOA pa scolnan di DPS entrante aña escolar 2020-2021
• Ampliacion di cantidad di localidadnan di 43 klas pa 68 klas.
• A haya adicionalmente diferente scolnan di DPS pa fungi como centro nobo di Traimerdia
• A haya 2 klas na Scol Dornasol na Sabana Basora pa muchanan special cu opcion di amplia cu mas klas
• Ta renobando tur e trailernan di Traimerdia
• Traimerdia San Nicolas ta hayando pa aña escolar 2020 – 2021 un trailer nobo despues cu e trailer di San Nicolas aña pasa a bira victima di candela debi na vandalismo.
• Hunto cu DRH ta repasando e ‘rechtspositie’ di e trahadonan di Bureau Traimerdia (BTM)
• A tene reunionnan cu e sindicatonan Topa y Seppa ariba diferente topiconan di BTM
• A tene reunionnan cu e lidernan conhunto como tambe individualmente
“Tin avansenan tumando luga, algun cu pasonan grandi, otro cu pasonan mas reserva, pero tur den e mesun direccion y cu e mesun meta esta di trece e miho cuido y guia pa mas hopi mucha cu ta posibel cu e servicio cu Bureau Traimerdia ta ofrece na un prijs social pa un y tur,” e mandatario a bisa.
