Riba 29 di september a sali un articulo den medio di comunicacion cu e titulo “Importacion den luna di augustus a baha cu 34 miyon”. E articulo menciona no a indica cu ta trata di specificamente luna di augustus 2023 compara cu augustus 2022.
Si analisa e cifranan publica pa CBS, cifranan te cu fin di augustus di 2023, ta mustra cu e balor di productonan importa a yega un suma total di Afl. 1.8 biyon. Di e suma aki, Afl. 1.71 biyon ta destina pa produccion y consumo local y Alf. 90 miyon via Freezone pa exportacion. E peso total te cu fin di augustus di 2023 a yega un total di 467 miyon kilo di cual 460 miyon kilo ta e peso importa pa produccion y consumo local y 7 miyon kilo via Freezone pa exportacion.
Aruba como economia chikito ta importa mayoria productonan cu cada un di nos ta cumpra den supermercado of tienda. Ta trata di entre otro productonan pa uzo diario manera cuminda, bebida te material di construccion. E productonan ta yega Aruba via barco- of avionnan di diferente paisnan y ta destina pa produccion y consumo local of Freezone. Tur productonan ta wordo categorisa den seccionnan manera por ehempel productonan alimenticio.
Si haci un comparacion entre augustus 2023 cu augustus 2022, e data ta indica cu den augustus 2023 a importa 34 miyon florin menos cu augustus 2022. Analisis ta mustra cu den augustus 2023 a importa pa 15 miyon florin menos na Petrochemical products, 14 miyon menos na Meat, Fish and Seafood, Dairy Products destina na produccion y consumo local, y Freezone 5 miyon florin menos na Food Products.
Pa loke ta trata augustus 2023 compara cu juli 2023, e data ta mustra cu a importa pa 3.6 miyon florin menos pero a importa den peso 33 miyon kilo mas. Di e 96 diferente seccion di producto, di carni te cement, 52 seccion ta mustra cu a importa 33.3 miyon florin y 11.2 miyon kilo menos, mientras 44 seccion ta mustra cu a importa 26.7 miyon florin y 45 miyon kilo mas destina pa produccion y consumo local.
Informacion publica pa Oficina Central di Estadistica ta indica un subida den balor y peso te cu fin di augustus di 2023 compara cu 2022. Den 2022 te cu fin di augustus, e balor di importacion tawata 1.6 biyon florin cu un peso di 433 miyon kilo. Esaki ta nifica cu te cu fin di augustus di 2023 e balor di importacion total a subi cu 180 miyon florin of 11 porciento compara cu te cu fin di augustus 2022. Pa loke ta trata e peso, te cu fin di augustus di 2023 e peso total a subi cu 34 miyon kilo of 8% compara cu te cu fin di augustus di 2022.
E cifranan publica pa CBS ta mustra cu te cu fin di augustus 2023 ta importa mas den balor y peso compara cu 2022. Esaki ta un indicacion cu aunke nos ta importa mas tambe den peso, nos ta paga mas tambe pa e productonan importa, nivel di prijsnan internacional ta keda relativamente halto.
Ministerio di Asuntonan Economico, Comunicacion y Desaroyo Sostenibel ta monitor continuamente desaroyo di importacion y exportacion di productonan y su impacto riba economia di Aruba.
Minister Geoffrey Wever ta gradici CBS pa e trabao diario y publicacion di datonan di sumo importancia pa nos economia.
Pa mas informacion over di cifranan di importacion y exportacion di nos pais por bishita e website www.cbs.aw
