Despues di e prome curso exitoso na Paradera, registracion ta habri pa e curso Finansas den mi Hogar den districto di San Nicolas. E curso ta start riba 27 di februari.
Na Aruba tres for di dies hogar ta gasta mas di nan entrada tur luna segun sondeo di Banco Central di Aruba. E desaroyo aki ta uno preocupante pasobra e ta indica cu cada luna ta un reto pa e hogarnan cumpli cu tur necesidad y responsabilidad financiero manera entre gasto pa vivienda, cuminda, y prestamonan personal. Como consumidor ta importante pa sa ki impacto cada decision financiero tin riba nos cartera y nos hogar.
Meta di e proyecto ta pa nos hendenan ricibi guia y conocemento cu por yuda tuma e decisionnan financiero cu ta beneficia su bienestar, den tur districto di Aruba y awor den districto di San Nicolas.
E Proyecto Finansas den mi Hogar a wordo desaroya door di Fundacion Plan di Bida. Fundacion Plan di Bida cu su presidente Paloma Osorio-Tromp tin como mision y vision trece conscientisacion den nos comunidad, ofreciendo ayudo y guia mustrando e manera pa maneha nos finansa mas efectivo.
Hunto cu Fundacion Plan di Bida lo ofrece un curso como apoyo na nos hendenan. E curso ta consisti di cuater sesion cu lo enfoca riba con nos por maneha nos finansas cada dia.
E cuater sesionnan ta:
- Sesion 1: Mi ta efectivo den mi cas. Con mi por spaar y tambe con pa cumpra sin emocion
- Sesion 2: Mi ta paga mi debe. Kico lo pasa ora mi no por paga mi debe mas
- Sesion 3: Mi ta inverti den mi futuro. Futuro di nos y nos yiunan ta importante y con nos por logra nos metanan
- Sesion 4: Mi presupuesto. Kico ta luho y prioridad y con segun bo entrada bo por presupuesta y asina logra nos metanan
Na final di e curso cada cursista lo ricibi un certificado di participacion.
Minister Geoffrey Wever ta invita cada un cu ta desea di participa pa haci esaki pa asina haya e apoyo necesario pa un maneho di bo finansas. Registracion ta completamente gratis, pero cupo ta limita.
Pa mas informacion y registracion por tuma contacto cu Fundacion Plan di Bida via telefon 5688848 of email [email protected]
