Siman pasa durante torneo di La Fama a tuma luga un incidente cu a laga un referee herida. Minister di Deporte tambe a reacciona riba e tema aki. Pero, e mandatario no tin un plan concreto p’asina evita violencia den deporte.
Endy Croes, Minister di Deporte, a indica cu cada federacion ta responsabel p’e reglanan, kico ta e strafnan cu nan ta reparti den caso asina. E federacionnan tin nan reglamentonan cu hopi bes ta mara na reglamento internacional, cu ta hopi pisa. Na momento cu el a mira esey, el a sali pa mustra con e ta lamenta loke a pasa.
Croes ta bin di e mundo di deporte y ta di pensamento cu tur hende por tin diferencia di opinion riba cualkier ‘call’ cu un umpire of referee haci. E no ta di acuerdo cu mester bay asina leu. Un coach mester sa hopi miho y durante wega di U13 di mucha el a agredi referee Bedoya te mand’e hospital. Segun e mandatario, e no a haya update riba e wowo di e referee.
P’e motibo ey, riba e mesun publicacion, el a bay riba e balornan olimpico. Esakinan ta papia riba excelencia den deporte, amistad y e ultimo ta respet. E mandatario a expresa cu e respet ta pa bo mes, respet pa contrincante, respet p’e reglanan. Tambe respet p’e ambiente deportivo.
