E Minister di Enseñansa no ta compronde ki problema por tin ainda cu mester pensa cu schoolgeld lo bay subi atrobe. Principalmente si mira cu gobierno a reduci e retraso di mas cu dies aña cu tabatin den aumento di e subsidio, esta e normbedrag cu mester tin pa enseñansa.
E mandatario, Endy Croes, a bisa cu pa mitiga e schoolgeld, ya caba gobierno den luna di september y december a ahusta e “normbedrag”. A splica cu e ultimo biaha cu a traha un rapport di kico e normbedrag mester ta, a sosode na 2009. Esaki siendo cu den ley ta hancra cu cada tres aña, mester aumenta esaki.
E Ministerio di Enseñansa a haci un estudio riba esaki unda cu a constata cu e ta 6.4 miyon florin atrasa. Na final na september, den e voorjaarsnota, a ahusta e suma cu 50% y pa e presupuesto di 2024 a pone e otro 50% di retraso pa bisa cu awo ta na e suma cu lo mester ta.
“E ariba menciona ta nifica cu e directivanan di scol ta haya hopi placa adicional …” Loke cu ta pasa ta cu gobierno no por mete den e directivanan di scol, solamente den e directiva di scolnan publico por bisa algo y a bisa nan caba cu “no ta aumenta schoolgeld”. “E otro fundacionnan mester dicidi si nan kier, of ta sinti e necesidad. Echo ta cu a percura pa nan haya mas placa, y tin directiva cu a haya mas cu un miyon florin pa mitiga e parti ey (aumento di schoolgeld).
