Den un declaracion duna Minister encarga cu turismo Dangui Oduber a papia tambe di e proyecto hotelero pa San Nicolas, den bisindario di Santana di Cacho.
E mandatario tambe ta bisa cu el a tende di e rumornan cu ta bisa cu a haci vloertest mientras cu riba rednan social ta papia hopi cos. Loke cu e mes a compronde for di e minister di infrastructura, ta cu e groundbreaking lo tuma luga e aña aki ainda. Den luna di november e grupo lo bin Aruba pa haci e groundbreaking oficial. No a tende for di departamento di DIP ni di DOW oficialmente cu e test di vloer a sosode. “Simplemente ta keda na rumornan cu ta circula riba rednan social awendia.”
Pero e por a compronde si cu e proyecto ta canando. E grupo ta comprometi cu Aruba y e grupo kier inverti. Ta un grupo cu tin e capital tambe pa inverti. Nan tin e financiamento cla y si tur cos ta bon, den luna di november e groundbreaking lo tuma luga.
Cuanto camber
Den e fase uno, segun e minister, nan lo ranca sali cu 300 camber. Fase dos ta otro 300 camber. Den futuro, nan lo añadi 300 camber mas cual lo no ta all-inclusive. E proyecto den su totalidad ta un masterplan den 10 aña. Lo tin 900 camber, pero e 900 camber aki por trankilisa comunidad cu e no lo bay bin awo. Awor aki 300 camber lo cuminsa. Despues ta sigui fase dos. Den futuro, nan lo tin di bay evalua si e proyecto ta uno exitoso lo tin e posibilidad pa expande den 300 camber mas cu no ta all-inclusive, cual ta European Plan.
Gobierno kier un desaroyo pa San Nicolas y un desaroyo turistico. San Nicolas lo mester bira e capital turistico di Aruba, pero kier faseer’e aki.
El a enfatisa cu Aruba no kier mil camber pero kier pa bay den fase poco poco p’asina duna San Nicolas e posibilidad pa bay cu e desaroyo. Gobierno no ta desea pa sosode loke a pasa den pasado, tempo cu a bin cu e boom di desaroyo na Aruba, cu ta haya cinco of seis hotel na mesun momento. Nan kier pa gradualmente desaroya San Nicolas.
Tereno
Por a scucha rond cu a duna e grupo aki un tereno demasiado grandi y no a keda espacio si tin interes di otro grupo cu tambe kier inverti pa un otro hotel.
Minister Oduber a comenta cu tin suficiente tereno pa hopi grupo. Tin hopi interes di parti di diferente comerciante local cu kier bin cu Boutique Hotel cu ta cuadra cu maneho y vision di e gobierno. Tin amplio tereno ainda cu a resta, despues di e tereno aki, bay te p’ariba. Semper e terenonan aki, bao di tur signatura di tur gobernacion den e ultimo 40 añanan, tabata designa pa desaroyo hotelero, desaroyo turistico. Esaki ta e prome plot cu a duna. Tin cu pone enfasis riba esaki, cu tur gobierno a purba bin cu un desaroyo. Gobierno di MEP a purba, gobierno di AVP a purba. E gobierno actual tambe ta purbando y ta spera pa bin cu e prome hotel pa San Nicolas. Tin tur indicacion cu esey lo ta e caso.
E areanan cu lo ta elimina
Tin di compronde cu e area di Santana di Cacho no lo bin construccion riba dje. E construccion ta riba e klif y for di e klif lo bin un trapi pa e huespednan tin acceso na Baby Beach. Ta bay bin mas presion riba e beach. Tin hopi turista y local ta haciendo uzo di Baby Beach. Ta p’esey lo amplia e beach y tambe lo bay drecha e beach. Door di e beach erotion cu a tuma luga, a come gran parti di e beach cu antes tabata full na santo blanco. Full eynan lo drecha tambe pa haci e beach hopi mas grandi pa por carga e capacidad cu ta bay bin ora cu e proyecto aki wordo entrega.
