Diahuebs ta Dia Mundial di Oido (World Hearing Day) caminda nos ta refleha riba e importancia den e cuido di nos oido. Den cuadro di esaki Minister di Salud Publico Dangui Oduber conhuntamente cu Minister-President Evelyn Wever-Croes a reuni cu Quota International of Aruba.
Den e reunion aki a hiba dialogo riba diferente punto di atencion den cuadro di cuido di oido. Quota International ta existi pa mas di 100 aña mundialmente y nan ta duna asistencia na hende muher y muchanan cu tin dificultad di oido y tambe di comunicacion, tambe nan ta concientisa, educa y informa comunidad con importante e ta pa cuida nan oido.
Minister Oduber a splica nan cu esaki ta cuadra cu maneho di salud caminda ta trahando riba un plan nacional di prevencion y esaki ta cuadra den e vision cu Gobierno tin pa informa e comunidad mas tanto cu ta posibel den e importancia den e prevencion y cuido di nan oido. Tambe e mandatario ta bay haci Quota forma parti di e plan nacional di prevencion como un ‘gesprek partner’ hunto cu DVG y demas stakeholders.
Minister Dangui Oduber ta pidi tur hende pa proteha nan oido, bisti un proteccion di oido por ehempel un earplug si bo ta labora den areanan cu zonido duro. E organo di nos oido unabes daño wordo haci na dje, e no ta cura mas, no tin remedi p’e, pesey mester cuid’e semper.
Finalmente Minister Dangui Oduber ta gradici Quota International of Aruba pa tur e trabounan cu nan ta haci como boluntario. Trabounan cu sigur ta yuda Gobierno hopi den e parti di campañanan preventivo, concientisacion y educa nos comunidad den con importante e ta pa cuida nos oido.
