‘Un total di 11 studiante cu a yega Hulanda na comienso di luna di augustus a test positivo riba covid 19. Un cantidad di 25 studiante a test negativo y tin 1 studiante di cual resultado di su test ta keda cla den transcurso di e siguiente dianan nos dilanti.’
Esaki Minister Plenipotenciario Guillfred Besaril a bisa durante e ultimo conferencia di prensa riba e situacion di Covid 19 bou di e grupo di studiante 2020. Banda di e grupo di 37 studiante cu a haci test e mandatario a bisa cu 21 persona, di cual ta mentornan y miembronan di e Plaatselijke Opvangcommissie a haci un test y tur a sali negativo.
Pa loke ta e studiantenan cu a test positivo minister Besaril a bisa cu ningun di nan a keda hospitalisa y cu poco poco nan ta saliendo di nan quarantaine y ta cuminsa nan bida como studiante na Hulanda. ‘Nos mester bisa cu pa loke ta asistencia, tur e studiantenan a haya debido asistencia di nan mentornan y e miembronan di e POCnan. Danki na e asistencia aki tur loke tabata e necesidad primario a keda cubri, bay supermercado, bestel cuminda pa nan y awor nos ta den e fase final pa esnan cu si a keda getest positivo.’ Sr. Besaril a remarca cu Cas di Aruba a duna asistencia durante di e periodo di 14 dia cu e virus ta activo y cu e tarea primario di “opvang” na e momento di yega na Schiphol di Cas di Aruba a termina.
‘Si den caso otro hobennan den e grupo of cualkier otro studiante test positivo riba covid 19, primeramente e ta un responsabilidad di e GGD y RIVM aki na Hulanda. Pero e hecho cu simplemente bo ta un Arubiano bo por conta cu e sosten y apoyo di Cas di Aruba pa asina aki nos por asisti bo,’ segun Minister Besaril, kende alabes a gradici staf y personal di Cas di Aruba, specialmente e departamento di Enseñansa y tambe e miembronan di e POCnan y e mentornan pa nan trabao den e guia di e studiantenan 2020.
