Despues di casi cuater aña di trabou duro, awe tabata asina leu cu Minister Andin Bikker a haci traspaso amplio y ordena di e cartera di Husticia y Siguridad na su sucesor, Rocco Tjon. Minister Bikker a bin ta prepara pa basta siman caba pa por efectua un traspaso structura, hunto cu un resumen di e logronan dje maneho hiba pa cu ful e ministerio, un di e ministerionan mas grandi di pais Aruba.
Tambe el a pidi cada hefe di departamento of instancia cu ta resorta bou di e ministerio pa duna di nan banda un bista di e temanan cu ta rekeri atencion e proximo lunanan den e aña presupuestario 2021 y comienso di 2022.
E traspaso di awe ta bin despues di dos reunion intenso caba entre Tjon y Bikker, hunto cu e departamento di finansa di e ministerio y e futuro asesornan cu ta premira lo bay forma parti di e team cu lo bay asisti Tjon.
En total minister Andin Bikker a traspasa na e futuro minister Rocco Tjon un total di como 28 map grandi yena di documento y informacion cu ta regarda e departamento- y instancianan cu ta resorta bou di e ministerio. Tur esaki riba su mes ta un diferencia di anochi y di dia compara cu ora Bikker a tuma e ministerio over di ex-minister Dowers. E tempo ey, e no a haya practicamente nada na informacion ni documentacion, cual a tipifica e completo abandono di parti di e Gabinete Mike Eman I y II pa cu entre otro e ministerio di Husticia durante no menos cu dos periodo di gobernacion.
Mas durante e mainta Bikker tambe a traspasa documentonan cu ta regarda e cartera di integracion, bou unda e maneho di stranheria y permisonan ta resorta na DIMAS. Den e caso ey a reuni cu Minister Glenbert Croes, cu lo tuma e maneho aki over, esta Asuntonan di Labor y Integracion. Ey tambe a entrega documentonan cu ta regarda trabounan realisa y referente e maneho existente.
Minister Bikker a informa Rocco Tjon y Glenbert Croes cu si en caso nan por tin pregunta, nan semper por yam’e.
Durante e mainta Minister Bikker tambe a haya reconocimento di minister presidente demisionario mr. Evelyn Wever-Croes pa e trabou realisa como Minister di Husticia. Minister Andin Bikker di su banda a yama minister presidente y tur su coleganan danki pa e cooperacion y sosten colegial y a desea nan tur clase di exito. Tambe a informa igual cu si ta desea semper nan por yam’e y conta cu su sosten.
Na final di dia Minister Bikker a gradici su personal cu a sostene e ultimo cuater añanan den e trabou incansabel cu el a realisa.
