Supuestamente Aruba a sali na di dos luga den Caribe despues di Bermuda como e pais miho ekipa pa combati labamento di placa y financiamento di terorismo, esaki segun certificacion di FATF. Segun Milton Ponson, presidente di Rainbow Warriors Core Foundation, na 2010, e fundacion a manda un carta pa Tweede Kamer indicando cu tin tres sector na Aruba via cual labamento di placa por tuma luga.
Un di nan cu a señala categoricamente tabata e bendedonan di loteria y un otro cu a menciona explicitamente ta tur organisacion religioso.
Den pasado na 2001, den e atakenan na Merca durante dia 11 di september, a sali na cla cu tabata uza fundacion religioso como vehiculo pa pasa placa pa esunnan cu tabata prepara pa haci e atakenan terorista, loke tambe a sosode den e periodo aki, fo’i 2001 te cu 2012 na Europa.
Aki tabatin varios atake di extremista musulman, financia via organisacion religioso, hasta conduciendo cu ley regarda funcionamento di NGO’s en general (sociedad civil), a bira mas severo riba e continente Europeo y na Merca, caminda cu e organisacionnan religioso mester registra.
Mayoria di nan tin e deber di registra na belasting pa nan ta visibel y tin di duna cuenta den registro di entidad huridico di tur nan actividad.
Sinembargo na Aruba cos ta un poco diferente. Aunke si mira cu rib’e continente Mericano, particularmente Centro America, Mexico y Brasil, tin organisacion religioso den pasado y ta uza nan ainda pa narcotraficante pa laba placa.
CON E COS AKI TA BAY
Segun Ponson, e organisacion religioso ta ricibi regularmente donacion cuantioso anonimo via cua nan ta organisa tur sorto di actividad caritativo hopi biaha pa combati adiccion di droga. E ironia di bida ta cu si mira esunnan cu ta tras di esaki ta bendedo di droga.
Na Aruba, mescos cu na Mexico y Brasil, e organisacionnan religioso a keda intocabel. Por corda cu tabatin un organisacion religioso cu sede na Dakota, comproba di tabata hinca den traficacion di droga y labamento di placa.
Ora cu mira kico a sosode aña pasa, dia prome di januari 2021, a drenta na vigor un ley cu ta mustra tur entidad huridico loke a resalta cu netamente e organisacionnan religioso ta exonera atrobe di tin cu ta registra.
Nan mester ta incorpora como entidad huridico. Ta nifica cu no ta necesario ni pa incorpora un organisacion religioso como fundacion y no tin cu registra na Camara di Comercio y no ta registra na Belasting. Pues nan ta invisibel y intocabel.
Si tene cuenta cu na 2010 Rainbow Warriors Core Foundation a señala na gobierno Hulandes cu tin tres instancia na Aruba, tres sector via placa por laba, cuminsando cu e bendedonan di lotto y catochi y e organisacionnan religioso y un instancia mas, cual ta prefera pa no menciona pa causa mas problema innecesario.
Gobierno Hulandes a opta pa sinta cu Rainbow Warrios Core Foundation y tuma nota di tur e comentarionan y e criterionan cu a uza pa sostene nan ponencia. Gobierno Hulandes a papia di acuerdo y solamente a keda riba mesa e organisacionnan religioso pa atende cu nan.
Despues di 11 aña ainda e organisacionnan aki ta intocabel y e pregunta ta keda dicon nan tin tanto poder tanto riba politico na Aruba, cu nan ta logra convence politico unanimamente den votacion pa cambia e ley y introduci e codigo civil nobo pa Persoonrecht. Unanimamente nan ta exonera e organisacionnan religioso pa incorpora y registra nan na Camara di Comercio y pa nan tin cu duna cuenta y registra nan na Belasting.
Esaki ta un pregunta kisas cu e pastoor den partido MEP, esta Marco Berlis, pa contesta, cu por cierto segun su propio CV cu el a presenta den campaña electoral aña pasa, cu el a sigui un estudio pastoral, pa e bay duna cuenta ki mishi cu e organisacionnan religioso tin tanto poder cu nan ta un clase di instancia apart cu tin mas poder cu ta para riba ley. Ora cu ta papia di FATF, e ta conta pa tur tipo di instancia cu por ta incorpora huridicamente como entidad legal y consecuentemente tin cu registra na Camara di Comercio, pero no ta conta p’e organisacionnan religioso.
Con esaki ta posibel y ki dia e cos aki ta bay cambia. Pasobra basicamente labamento di placa y financiamento di terorismo keto bay ta plenamente y legalmente posibel via organisacion religioso aki na Aruba. Tanten cu esey t’e caso e certificacion di FATF por bay den bari di sushi, Ponson a bisa por ultimo.
