Fecha di 4 di april ta marca dies luna desde e morto di Sayuri Petronia, yiu di Mike Petronia. Hustamente riba e fecha aki, el a combersa cu 24ora.com tocante cambionan cu el a spera di mira na nivel di maneho nacional, pero cu no a concreta. Mas bien, casonan di tiramento y morto ta keda bin dilanti.
El a indica cu e mes tabata presente na e reunion cu Parlamento di Aruba a yama na november 2021 y finalmente a tuma luga dia 14 di maart ultimo. El a keda eynan henter dia como un tata cu a perde su yiu y ta preocupa pa e situacion di criminalidad. Den transcurso di e reunion a pasa diferente mocion, pero esun mas importante no a pasa. Tabata esun pa top di husticia y Parlamento inicia un dialogo di analisis y reforma di ley hudicial.
Esaki ta algo cu Petronia ta lamenta hopi pasobra despues di e reunion aki, el a haya reaccion negativo di politiconan cu ta argumenta cu hobennan merece di haya un di dos oportunidad. Di su banda, e ta di acuerdo cu esey, pero dos oportunidad of ta cuanto oportunidad tin cu duna, e ta puntra su mes. Miho lo ta pa despues di e di dos fayo si duna un bon castigo pa manda un señal cla cu no ta wega tin. Esaki ta algo cu e no ta compronde dicon tin resistencia p’e.
E ta kere cu ta mas bien un wega politico. Ta bay wak ken ta esun cu ta bin cu mocion y ki color e ta y si mester apoy’e of no. “Awe hopi hende ta bisa cu Mike tin rason. Despues di e reunion ey di 14 di maart, a haya un hoben den scol cu un shot gun, tabatin un drive by na Pos Chikito, tabatin un tiramento na Weg Fontein, a haya un homber morto na Zeewijk”. E ta puntra pueblo si e tin rason den loke e ta papia?
