Desde e momento cu nos a mira den presupuesto 2022 cu Gabinete Wever-Croes ta bay cobra loonsubsidie bek di e empresanan cu supuestamente a haya di mas, nos a alerta pa e forma con ta bay haci esaki, e lider di fraccion di AVP mr. Mike Eman a expresa cu hopi preocupacion.
A mira den presentacion di Gabinete Wever-Croes ta bay cobra bek, pa medio di SVB, mas di 80 miyon florin for di e empresanan mediano y chikito. Segun Gabinete Wever-Croes mas di 1800 empresa inhustamente a haya mas loonsubsidie cu nan tabata tin derecho riba dje.
Mike Eman ta bisa cu, e momento cu Gabinete Wever Croes a anucia e cobramento bek aki nos a expresa cu nos ta teme cu hopi negoshi na Aruba no ta prepara pa por bay sobrebibi sin loonsubsidie, corda bay paga bek e sumanan cu Gabinete Wever-Croes ta menciona, anto den un termino di dos aña.
Den Parlamento Gabinete Wever Croes a bin anuncia durante tratamento di e ley di loonsubsidie cu lo bay na cobra e empresanan aki, pasobra segun calculacion cu a haci via departamento di impuesto e empresanan aki a haya demasiado salaris subsidie. Eman ta bisa cu a alerta cu mester atende e asunto aki cu hopi cautela, pasobra negoshinan ta hopi fragiel na e momentonan aki.
“Nos a hasta referi na locual a pasa na Hulanda, con un proceso asina di cobra mayornan bek e sumanan di kindertoeslag cu supuestamente nan lo a haya dimas of no tabata tin derecho riba dje a desemboca den un proceso hopi inhusto den cual miles di famia a bira victima. For di esaki a sali un rapport devastador bou di e titulo Ongekend Onrecht. Un inhusticia nunca bisto, tabata e conclusion di e investigacion parlamentario, cometi contra miles di famia inocente”, ta locual Eman a bisa.
Awe tin un situacion alarmante, ongekend onrecht ta tumando luga cu e negoshinan chikito y mediano cu un cobramento feroz cu ta bay desemboca cu hopi negoshi lo mester bati bancarota pa motibo di e forma con Gabinete Wever-Croes awor kier cobra loonsubsidie bek. Nos ta tende di sumanan entre 50.000 florin te cu 350.000 florin cu ta cobrando e empresanan chiquito y mediano, e lider di fraccion di AVP, mr. Mike Eman a enfatisa.
A haci campaña cu FASE y Loonsubsidie y awor ta bati na porta di tur hende pa paga bek. “Ongekend Onrecht”, ta bira amargo realidad awo na Aruba. Gabinete Wever-Croes no kier realisa cuanto nan a perhudica y chica e pueblo caba, e lider di fraccion di AVP, mr. Mike Eman ta finalisa bisando
