Diamars gobierno di Aruba a anuncia cambio den prijs di e productonan petrolero na Aruba.
Entrante diaranson, 13 di april, prijs di gasolin lo conoce un aumento di 30 cen, mientras cu diesel lo conoce un aumento di 45 cen y kerosin lo aumenta cu 43 cen. Esaki sigur ta un sla duro pa tur ciudadano, pero mas ainda pa e chauffeurnan di bus, e chauffeurnan di taxi.
Gobierno di Aruba ta culpa e guera entre Rusia y Ucrania di esaki, pero hecho ta cu e prijsnan di combustibel tin algun luna caba tabata aumenta, tur luna, sagradamente.
Parlamentario di fraccion di AVP, ing. Mike de Meza a cuminsa na bisa cu e guera entre Ucrania y Rusia a cuminsa e aña aki den luna di februari, mientras cu e presupuesto di pais Aruba tabata traha for di aña pasa caba. Es decir cu por a aplica e cambionan den e presupuesto. Es mas, fraccion di AVP a mustra gobierno cu por haci e cambionan aki.
Si wak e desaroyonan rond mundo, por ehempel na Hulanda, gobierno a freeze e accijns, te hasta a baha esaki. El a haci esaki pa e islanan BES tambe. Na Corsou tambe a baha e accijns. Pero Aruba, na luga di tuma accion di baha accijns y si mester, ta baha e post di goederen en diensten pa compensa esaki, gobierno ta demostra di no ta haci nada pa evita esaki y mustra cu di berdad, nan a perde nan autonomia.
Gobierno di Aruba a informa e pueblo cu nan no por haci nada pa mitiga e aumento, ya cu prome cu esaki nan lo mester consulta cu CAft, mientras cu esaki ta algo netamente di e pais. E ta algo cu lo mester pasa den Ministerraad, de Meza a bisa y si kier, ta bin cu ne den parlamento. Pero tabata tin varios opcion pa mitiga e prijs di gasolin, pa asina evita e aumento cu nos lo conoce entrante diaranson.
