Den e reunionnan di IPKO ta discuti diferente topico. E biaha aki e parlamentarionan a haya lectura di dos profesor di Universidad di Leiden. Nan a papia riba nan buki Ongemak, cual ta un estudio haci riba relacion den Reino.
Durante e lectura a papia riba e deficit democratico den reino, tambe a duna proposicion. Un di e proposicion ta pa duna un asiento na Tweede Kamer pa locual ta e islanan. Miguel Mansur, lider di fraccion Accion21, a splica cu el a gusta cu nan a cristalisa tres proposicion.
E prome proposicion tabata di duna tres asiento na e islanan di Aruba, Corsou y Sint Maarten. Aki nan a bisa hacie specifico p’e isla, pasobra si hacie den Antias por ehempel Corsou su poblacion ta dobel di Sint Maarten. E ta duna un bos den Tweede Kamer y ora di forma coalicion e asientonan, di cual nan a tuma e ehempel dje sistema di Dinamarca. Por ehempel tin Groenland y Faroe Islands, y cada un tin dos asiento den parlamento di Dinamarca. A duna ehempel con esey a resulta ora di forma coalicion.
Segun Mansur, loke nan a palabra den e delegacion cu tur esey ta miho cu loke tin aworaki. Pero tanten cu e no ta bin a costo di por ehempel di minister plenipotenciario, un bos den Rijksministerraad. Mansur ta na fabor di esey.
E otro modelo cu a bin ta di Parlamento di Reino, cual e parlamentario ta kere di duplica un instituto no ta bay haya atencion di e Hulandesnan, pasobra e no ta bay ta mes importante. P’esey e ta hay’e no faborabel.
E di tres opcion tabata pa simplemente e habitantenan di Aruba, Sint Maarten y Corsou vota normal den Tweede Kamer sin tin un asiento prescribi. Esey obviamente no ta garantisa cu Aruba mes tin un asiento den Tweede Kamer. Esey no ta atractivo. Tambe p’e Hulandesnan e ta un riesgo, pasobra tin chens cu un partido Arubiano ta eligi pa Tweede Kamer. E ta un fraccion acerca, tin su gasto y ta cambia e dinamico.
Pa su persona e prome opcion di duna cada isla un stoel den Tweede Kamer ta esun di mas atractivo. E ta miho cu loke tin aworaki. Mansur ta uno cu ta propone pa traha y purba coregi e democracia deficit sin sede nada. Pero no cu ta haya un asiento den Tweede Kamer y perde minister plenipotenciario den Rijksministerraad. Tur esey ta posibel, pero tur e cosnan aki por ta posibel specialmente n’e momento aki cu ta tratando e legado di colonialismo y sclavitud. Aunke nan no ta mescos, nan ta liga na otro. P’esey e ta bisa cu mester ta bon prepara y mester tin un dialogo nacional na Aruba riba kico como pueblo, como pais kier saca di esaki. Tambe con ta mira futuro di Aruba den Reino.
HACI CAMBIO GRANDI
E ta spera cu e politica di Aruba tin e will power pa haci un cambio grandi asina. E parlamentario a remarca cu ora nan ta eynan, nan ta forsa di papia mas riba asunto di estado, nation building. Asina cu yega bek na nan pais respectivo, ta bek den e mundo di partidista. Mansur no sa con pa mantene e spirito di nation building bek den politica partidista cu ta biba na Aruba. E ta keda optimista, ta spera cu por logr’e. Tambe e ta spera cu e partidismo cu ta biba den e ultimo binti aña no domina y horta pueblo di Aruba esey tambe.
