Recientemente Parlamentario Miguel Mansur di fraccion Accion21 a dirigi algun preguntanan por escrito na Minister di Asunto Economico, Comunicacion y Desaroyo Sostenibel, mr. Geoffrey Wever relaciona cu e doorlichting di Post Aruba (Postkantoor) relaciona cu Landspakket. Segun por a compronde, e doorlichting ta finalisa y pa cual Mansur ta pidi e Minister en cuestion pa bin Parlamento pa asina por suminsitra Parlamento cu informacion riba esaki.
Pa loke ta Tele Aruba, cual ta un subsidiario di Setar, e Parlamentario pa Accion21 ta pidi Minister Geoffrey Wever pa comparti, den caso cu tin, e balans financiero (financial statemente) cu Parlamento. Den caso cu esaki ta negativo, Mansur ta pidi Minister Geoffrey Wever pa comparti cu Parlamento e documentonan financiero di Tele Aruba.
Mansur ta sigui bisa cu nan fraccion di Accion 21 a tuma nota di e gastonan excesivo di e fiesta di fin di aña di AZV. E instancia a gasta cerca di 50.000 florin pa un fiesta riba Renaissance Island cu placa di e asesugradonan. Tambe a tuma nota cu WEB a cancela su fiesta di fin di aña na Ritz Carlton, pero a cancela esaki. E simpel echo cu a planea esaki na momento cu e prijsnan ta halto pa cliente y e reservanan ta na suela, ta preocupante.
Pa es motibonan aki Mansur, lider di Accion21 a pidi pa Minister di Asuntonan Economico, comparti cu Parlamento e gastonan completo di tur e fiestanan di fin di aña di e departamentonan cu ta resorta bou di su ministerio.
Por ultimo, lider di Fraccion Accion21 ta pidi e minister pa comparti su CV cu Parlamento, unda cu e ta detaya su historia profesional di e ultimo 20 añanan. Esaki ta incluso e fechanan unda cu e minister a cambia di trabou, bufete y/o funcion.
