Victoria di Geert Wilders den eleccion pa Tweede Kamer ta sorprende y alarmante pa hopi hende. Pero e ta mustra cu e pueblo di Hulanda kier cambio radical. Esaki ta e pensamento di Miguel Mansur, lider di Accion21 y miembro di parlamento pa e fraccion aki.
E cambio radical aki, Mansur a bisa den su declaracion, ta algo cu el a señala den diferente reunion di Ipko (reunion entre parlamentonan di Reino Hulandes). Na su parecer e pueblo ta fada pa diferente tema, entre otro e tempo cu ta pasa for di momento cu gobernantenan pasa un ley y e momento cu esaki duna resultado pa e pueblo ta mucho largo.
“E pueblo ta haya e impresion cu nan ta bay eleccion cada cuater aña pa un cambio, pero esaki nunca ta yega. Of mira resultado. Pues un malcontento cu e politica tradicional, cu ta sinti na Aruba tambe.”
E mes tin un solo experencia cu un miembro di PVV (partido di Geert Wilders) y na momento cu a puntr’e su pensamento riba e islanan, kisas e lo ta loke hopi no kier tende. E ta haya cu Hulanda mester haci e situacion hopi mas facil pa e islanan bira independiente y sali for di Reino. Awendia sinembargo e ta nota un Geert Wilders hopi mas modera. E tin hopi pensamento extremo, manera prohibicion di Moskeenan, cu ta bay en contra di Constitucion.
Pa loke ta e resultado en general, esaki ta mustra cu a vota pa un gobierno derechista cu ta encera mas cumplimento fiscal cual Accion21 ta apoya. Si e ta kere cu e lo ta un fout grandi si trata di exclui Wilders for di e gobierno nobo ya cu e lo bolbe mas fuerte. “Ta miho contene den un coalicion cu ta modera e extremonan di e partido.
Pues lo ta un fout grandi pa bin cu formacion di un coalicion iskierdista y derechista, lagando PVV afo, ya cu e lo bini mas fuerte. Loke lo ta mas preocupante, ademas di e intolerancia pa cu religion y inmigrantenan, ta su deseo di saca Hulanda for di Union Europeo. Awo no tin un mayoria cu ta apoya e pensamento aki.”
Resumiendo e ta visualisa un gobierno derechista cu menos interes pa e islanan den Caribe. Aruba a tira diferente oportunidad cu Hulanda a duna afo, y e gamble cu prome minister a tuma pa gana tempo y haya un miho deal den futuro “a resulta un eror” y e pueblo tin cu bay paga pa esaki.
Gobierno MEP / Raiz no a haci ningun preparacion pa futuro cu un gobierno diferente na Hulanda y e ta lamenta esaki. Pasobra ken cu bay forma, mester tuma actitud pa traha den un forma constructivo.
