Un biaha mas Marinierskazerne Savaneta ta tene nan Open Dag, cual ta tuma luga dia prome di mei. Aki tur hende por cera conoci cu e mariniernan pero tambe mira algun cos cu nan tin. Apart di tin e oportunidad di conoce e mariniernan, tambe tin chens pa topa cu e trahadonan di Wardacosta. Participando den e evento aki Wardacosta ta trata di haya interes di e hoben- y adultonan pa forma parti di e cuerpo aki. Manera sa, Wardacosta tin un campaña unda hoben entre diesocho y binticinco aña por join nan.
Miguel Gonzalez Perret-Gentil, vocero di Wardacosta di Caribe Hulandes, a indica cu nan t’ey n’e famoso Open Dag di Marinierskazerne y ta join tur aña. Wardacosta t’ey p’asina e pueblo di Aruba cera conoci cu nan y haya tur informacion cu nan kier sa. Tambe esaki t’e oportunidad p’e hobennan di Aruba, entre e edad di diesocho y binticinco aña di edad por registra y bira funcionario di Wardacosta.
Pa nan e dia aki ta uno sumamente importante. Dia prome di mei ta e ultimo dia pa e hobennan por registra. Ta invita tur hoben masculino y femenino di Aruba entre e edad menciona pa pasa libremente cerca Wardacosta. Nan ta na Marinierskazerne desde 10:00 am, unda tur hoben por pasa pa haci nan preguntanan y registra pa Wardacosta. Ta haya chens pa mira di cerca un tiki di e trabou cu e cuerpo aki ta realisa.
Pa por registra ta simpel. E hoben mester bay cu un identificacion valido, papel di Censo (di 5 florin), diploma di MAVO 4 of HAVO, EPB Doorstroom nivel 2, EPI niveau 3 y 4, Onderwijs Avond Aruba (OAA). Bayendo cu tur e papelnan aki, e ora por registra pa Wardacosta.
A haya miembro nobo
Den tur e añanan cu Wardacosta a forma parti di e Open Dag di Marinierskazerne Savaneta, nan a haya personal nobo. El a splica cu aña pasa hopi hoben masculino como femenino a registra y nan ta trahando actualmente. Un ehempel cu el a duna ta cu si a haya registracion di 120, nan no por tuma tur. Tur aña tin un cantidad di cupo cu ta habri cu nan por tuma hende nobo. A yega di pasa, manera esunnan cu a registra aña pasa, ta traha na Wardacosta.
Opleiding
E opleiding tin un duracion di 1 aña largo. Na momento cu registra, nan ta cuminsa cana un proceso di preseleccion. Nan ta tene un entrevista y pasa den henter un proceso. En caso cu selecciona e candidato, ta cumpli cu tur rekisito, fisicamente ta den estado pa bira miembro di Wardacosta, na momento cu e opleiding inicia na augustus tur hende ta bay Corsou.
E opleiding ta tuma luga na Corsou y ta dura casi un aña largo. Tin momento nan ta bin Aruba, unda tin training sa tuma luga.
Fisicamente den bon condicion
Momento cu ta papia fisicamente den bon condicion no ta solamente referi cu e persona por landa, core, y cu e ta den bon condicion fisico. Tambe e parti di salud ta hunga un rol. Gonzalez Perret-Gentil a splica cu si un persona ta bisti bril of lens, esey ta hunga un rol. Nan no mag di bisti bril ni uza lens y motibo di esaki ta pasobra si bula na awa pa rescata un bida, un ola dal e persona y lens cay afo, esey ta bira un problema aunke e bista ta +1 of -1. Esey ta motibo pakico no ta permiti lens ni bril. E vision mester ta 100%.
Antecedente
Gonzalez Perret-Gentil a splica cu si e hoben tin un antecedente of problema cu ley y a cay cera, e no por aplica pa Wardacosta. Si polis detene bo y haci un control y laga bo bay, esey no ta stroba bo pa aplica. Pero si tin antecedente penal, e ora si no por aplica cerca nan.
Gonzalez Perret-Gentil a invita henter pueblo di Aruba pa yega na Marinierskazerne dia prome di mei. Esaki ta e oportunidad pa cera conoci cu e coleganan di Defensa, pero tambe pa pasa na Wardacosta. Aki por acerca su persona y haci e preguntanan desea. “Bira un agente di Wardacosta. E ta un carera bunita anto bo ta sirbi bo pais”, el a enfatisa. “Bo ta sirbi bo pais. Bo ta bezig ta proteha bo costa di hende no desea cu ta yega, pero bo ta salba bida tambe.” E ta recorda tur hoben cu ta desea di registra di biaha pa pasa cu nan identificacion valido, papel di Censo y diploma, y asina ey por cuminsa cu e proceso di biaha.
