Ta asina cu gobierno di Corsou a cumpra Campo Alegre pa e suma di 8 miyon florin. Durante nos encuentro cu Secretario di Estado, drs. Alexandra van Huffelen na Hulanda e siman aki, nos a puntr’e kico ta su opinion tocante esaki y si ta hay’e bon ehempel di un bon gobernacion.
Van Huffelen su reaccion ta cu gobierno di Corsou ta esun cu mester determina riba kico nan ta inverti den dje. “Nan a indica cu nan ta haya esaki un paso hopi importante, dus ami ta lag’e na e gobierno di Corsou.” Rey Willem Alexander a trece pa dilanti recientemente cu gobierno di Hulanda conhuntamente cu gobierno di Corsou, Aruba y Sint Maarten mester percura pa tin bon gobernacion, y nos pregunta ta con esaki ta sinta na Hulanda na momentonan aki. “Ami tambe ta haya esaki un tema hopi importante.
Rey Willem Alexander ta enfatisa riba esaki den nomber di gobierno, di cual ami ta parti di dje, el a subraya algun cos manera cu nos ta pertenece hunto, nos ta un Reino unda cu ambos tin nan responsabilidadnan.” Un di e responsabilidadnan aki sigur ta pa percura cu tin crecemento economico, Rey Willem Alexander a toca riba esaki tambe.
