Tin un tendencia ta bay rond cu e palabra di Dios ta anticua, y cu tin e cosnan cu mester ta cambia den dje, pasobra e no ta fit cu pensamento moderno di cierto hende of grupo. Pasobra locual Dios ta exigi ta hopi fuerte, pa e bagamunderianan di actualidad por continua.
Shelo y tera por pasa, ma e palabra di Dios lo permanece pa semper. Dios ta soberano y locual Dios ta bisa pica ta pica. Y locual Dios aproba cu ta Su Boluntad ta keda Su Boluntad.
Ni maske cuanto cambio ta haci aki na tera, por ehempel e leynan cu ta cambia mundialmente aprobando, inmoralidad sexual, impuresa, y abominacion esey no ta nifica cu Dios Su pensamento ta cambia den shelo. Pasobra hopi hende sabi te ainda no kier comprende cu Dios ta soberano y cu bida di hende ta manera yerba berde riba e mundo aki. Un tempo e t’ey y despues e lo seca, y caba na nada.
Locual si tur hende mester corda ta esun cu rechasa e Yiu di Dios, aki na tera lo ta rechasa pa Su Tata cu ta den shelo (Mateo 10:32-33). No tin entrada na shelo, pa esun cu no ta kere den Cristo Hesus, esey ta para skirbi cu tur claridad den Juan 3:16-18, y cu un bon recordatorio den Juan 3:36.
Ningun hende no por cambia locual tin para skirbi den 2 Pedro 3:7 cu ta bisa; Ma e shelo y tera actual pa medio di Su palabra ta reserva pa candela, warda pa e dia di huicio y destruccion di hendenan impio. Miho bisa tur esunnan cu no ta kere den Cristo Hesus kende Dios a manda pa salba e mundo. Pero locual nos tur mester haci ta aprecia locual Dios kier haci pa nos tur den 2 Pedro 3:9.
Ta bon pa nos curasha otro, ta bon pa trece palabra di sabiduria y conocemento pa nos traha riba nos crecemento spiritual, pero crecemento spiritual sin santidad, no ta bal nada, pasobra e palabra di Dios ta bisa: Aspira pa tin pas cu tur hende y santificacion, sin cual ningun hende lo no mira Señor (Hebreonan 12:14).
Hopi hende no ta notando cu nos ta saliendo for di locual hopi a yama Evangelio di Prosperidad cual ta hende a inventa, y cu nos ta drentando un epoca di Good looking Gospel ( Idolatria di hende), bisando cu algo ta bon pasobra cierto hende a bisa.
Pero e palabranan ey semper ta para skirbi den bijbel pa esunnan cu ta medita den e palabra. Ningun hende por traha of construi riba otro fundeshi cu no ta Cristo Hesus, pero e mester wak bon con e ta traha, no halsando su mes, pero dunando tur Gloria na Dios.
Ningun mensahero no por ta mas grandi cu e mensahe y e mensahe ta Cristo Hesus, pasobra Dios ta soberano.
Pasobra e palabra di Señor ta berdadero y tur Su obra ta haci den fieldad (Salmo 33:4).
Señor ta haci e conseho di nacionnan bira nada. E ta desbarata e plannan di e pueblonan. E conseho di Señor ta permanece pa semper. E plannan di Su curason ta di generacion, pa generacion (Salmo 33:10-11).
Bendiciona ta e nacion cu su Dios ta Señor, e pueblo cu El a scoge pa Su propio herencia (Salmo 33:12).
E enemigo a sembra mal simia den e cunucu (Mateo 13:37-39), pero laga nos tur corda cu e enemigo no ta doño di e cunucu. Dios ta Soberano y doño di henter universo.
Sinceramente,
Pastoor Marcel Balootje.
