Tabata algun dia pasa cu a informa riba un derame di petroleo cu lo a yega costa di Boneiro y Corsou relaciona cu un incidente cu a tuma luga na Trinidad and Tobago dia 12 di februari 2024. Aruba a keda monitor esaki y a bay over na fase geel mientras a sigui e desaroyo, pasa despues pa codigo oraño riba “stand by” pa cualkier eventualidad.
Awor ta resulta cu un turista cu tabata disfruta di lama na Noord, den area di Westpunt Beach a señala algo straño riba e beach, cual e ta pensa por ta parti di e derame. El a saca potret di esaki unda cu por mira loke ta mustra manera manchanan preto riba e beach.
Nos a acerca autoridadnan concerni si lo por tin un “update” riba e situacion aki, si lo por a detecta algo caba na Aruba. Nan ta informa nos cu e scoutnan no a constata nada ainda.
Nan ta bezig cu e ultimo imagennan di satelite y tur indicacion ta mustra cu Aruba a scapa for di e derame aki. Sinembargo, e posibilidad si ta keda cu por haya algun ‘aanspoeling’ di “teerballs” den e simannan cu ta sigui, cual ta probabel loke e turista a topa cu ne. Ora constata patchnan/teer di azeta na nos costa, lo start cu un accion di limpiesa mesora, specialmente si e ta na un di e sitionan cu publico ta landa. Of si e ta na un di e sitionan cu turtuga tin neishi of cu nan ta uza pa nan neishi. Di otro banda, lo no tuma accion mesora si tur patch/teer ta riba barancanan cu no tin risico pa hende of bestia.
Di parti di Crisis Management Office (CMO) Aruba ta haci e yamada na tur persona cu ta bishita nos costanan den e dianan nos dilanti pa yuda tira un bista pa asina mira si ta detecta cualkier señal di patch/teer di azeta. Den caso cu constata algo por reporta esaki via e-mail [email protected] of yama telefon 588-0100 of via whatsapp 592 9600.
