Dia prome di juli ultimo, gabinete Wever Croes a kibra cu su promesa na pueblo di goberna sin medida y a impone un pakete di medida riba pueblo, cu a crea cantidad di situacion sumamente delicado den hopi cas rond Aruba.
Parlamentario Michael Lampe ta mustra cu e impacto cu e medidanan aki a crea den nos comunidad, ta realmente impresionante creando situacionnan delicado pa hopi famia di menos recurso y esunnan cu entrada minimo.
No solamente pueblo ta wordo afecta pero e pakete di medida aki ta asina fuerte cu e ta afectando comercion y a pone cu ‘the cost of doing business’, a bira mucho mas caro y tur esaki lo bay cay riba custia di pueblo afectando nan situacion ainda mas.
“Gabinete Mike Eman I y II na tur momento a percura pa yuda esunnan cu entrada minimo y nos pensionadonan prome cu tur cos, yudando famianan cu compra di material pa scol, eliminando pago si schoolgeld y cubriendo esaki riba gasto di gobierno pero esaki ta algo cu awor cu un aña escolar nobo ta bay cuminsa, no por scucha e gobierno di coalicion, haci mesun cos.
Despues di casi ocho aña cu gabinete Mike Eman I y II a duna un man pa famianan por prepara pa un aña nobo di scol cu mas trankilidad, awor nan ta para dilanti di un incertidumbre increibel, sin sa con nan ta bay haci.
Costo di bida ta subiendo den un forma increibel, casi tur producto a subi di prijs mientras cu prijs di gasolin lo sigui subi den proximo lunanan, cu a bira mas caro tambe dor di e decision di e actual gobierno, pa impone cobransa di accijns riba esaki pa asina e por haya 10 miyon extra mas riba loke ya caba gobierno lo saca for di cartera di nos pueblo.
E desaroyo negativo aki, e cambio drastico cu tur hende ta confrontando den e dianan aki, ta producto di un gobierno cu ainda no sa kico e kier haci y con e kier haci esaki, ya cu na moento c’un gobierno pasa un ley asina impactante manera aumento di BBO y BAZV, caminda esaki a tuma luga den un lapso di cuater dia, ta mas cu claro cu ta pueblo lo bira victima di e ansha pa placa di e gobierno aki.
Parlamento a ricibi e concepto di ley diabierna atardi y ya pa diamars anochi esaki tabata aproba cu sosten di tres fraccion cu ta sostene gobierno y ta despues cu e ley a bira oficial, gobierno a bin ripara cuanto cos a bay robes y e impacto cu esaki lo bay tin riba e situacion financiero di nos pueblo y cu na su turno lo bay crea mas problema social.
E incertidumbre financiero ta wordo empeora ainda mas c’un insistencia di un minister di enseñansa cu kier bay privatisa scolnan, creando incertidumbre cerca maestronan envolvi y tur esaki apesa cu Parlamento a pasa un mocion cu minister no por haci esaki.
E situacion ta asina delicado cu hasta miembronan di fraccionnan cu ta sostene gobierno, ta bisando pueblo cu ‘tempo nos dilanti no ta esun mas favorabel, pero si tur hende coopera lo saca e isla dilanti,’ cu ta un expresion cu ta confirma e incapacidad di e gobierno aki.
Pa hendenan cu a sigura pueblo cu lo no tin medida durante di campaña, awor ta bin dilanti y confirma cu bou di maneho di gabinete Wever Croes cosnan lo no ta favorabel.
Ta algo hopi serio, sigur ora cu ta e gobierno aki a tuma medida contra pueblo, ta rancando placa for di cartera di pueblo y ta pidi mesun pueblo aki pa carga pasensho, pa sufri un tiki ya cu ta esey ta bisando pueblo, cu despues cosnan lo drecha.
Ta mesun gobierno cu si a acomoda nan hendenan, a tuma sostenedonan den servicio di gobierno tur caminda y ta sigui haci esaki keto bay, cu ta percura pa recompensa sponsornan di nan partido pero pa pueblo ta pidi pasenshi y cu cosnan lo por bay drecha den futuro,” Parlamentario Michael Lampe a declara.
