Cu tristesa mi ta mira con MetaCorp, EcoGas y Tropical Bottling Company ta manifestando como un famia grandi pa “NO KITA MI PAN”. Con por ta posibel cu den tempo malo y den tempo bon, famia de Veer semper a para tras di e economia di Aruba como Arubianonan cu stima nan isla “Aruba Dushi Tera”.
Mi no ta bay defende ningun hende pero como cu mi conoce Sr. Eduardo y Sr. Eddy de Veer (mi amigo sincero) cu tur ora cu mi a bati na porta di Tropical Bottling Company pa donacion semper a habri man pa yuda mi, pero no pa mi persona, sino pa e pueblo di Aruba manera pa yuda recauda fondo pa scolnan, misanan, deporte, grandinan y mucho mas pa menciona. Hopi hende no sa cuanto nan ta aporta pa yuda e pueblo den necesidad sin mester di propaganda. Pesey mi a lanta awe pa mi para tambe como cuidadano pa mustra mi malcontento cu e situacion aki unda tata y mamanan di famia ta roga pa NO KITA NAN PAN.
Aki ta muestra di corahe di e trahadonan cu a subi caya cu nan flanel y trucknan cu nunca mi a yega di mira aki na Aruba pa bringa pa loke ta nan unico entrada pa cria nan famia. Ta di admira con nan Director, Eddie de Veer, ta kita su caminsa pa bisti e flanel cu ta representa su trahadonan como un persona humilde y sincero apoyando e manifestacion na un forma corecto y sin violencia pero busca husticia, no manera hopi ta critica, pasobra nan no ta corda riba nan rumannan cu tin miedo di perde nan pan cu ta e unico manera pa no mira nan famia specialmente nan yiunan muri di hamber pasobra no tin entrada.
Unda humanidad y hermandad a keda den un isla cu yama Aruba cu su hendenan humilde y servicial? A lubida cu si cera e portanan di e companianan di famia de Veer ta hopi Arubiano ta keda riba caya y tur hende sa cu no tin suficiente trabou disponibel na Aruba anto tin di busca onderstand na unda gobierno cu ta bisa cu no tin placa lo bai busca di ranca di e pueblo pa duna onderstand cu no ta yega pa nada y aki nos divisa di compra ta baha y esey ta trece cu ne pobresa y ladronicia.
Nos tur sa cu nos economia no ta stabil mas y nos tin inflacion na porta. Si tin trabou, comercio ta sigui flota y ta yuda e economia en general. Un salario gana cu sodo di frenta ta trece cune stabilidad y tambe interes pa sigui trece placa den caha di gobierno. Sin salario no por paga debe mucho menos belasting y banconan ta cuminsa kita cas, auto ext. y unda gobierno por bay pone e famianan cu no tin dak pa biba.
No mira ken ta bira rico of ken tin capital pero pensa riba esunnan cu ta biba di nan sodo di tur dia. Corda awe ta di mi mañan por ta di Bo. “PODER TA DIOS SO TIN. STIMA BO PUEBLO PA BO PUEBLO STIMA BO, SI BO ABUSA DI BO PUEBLO BO TA CREA ODIO Y ENEMIGO PA BO MES. CORDA CU MATERIAL Y PUESTO NO TA PA SEMPER Y ORA DI MORTO BO NO TA BAY CU NADA PERO SI BO HACI BON BO TA BAY CU RESPET Y HONOR DI E MUNDO AKI. Lesa 2 Cronicas 4-11 den Bijbel
Boso sirbido: Omaira I.Rodriguez-Britten
