Cuerpo di Bombero a inicia un investigacion preliminar pero dialuna lo continua mas detaya, via nan departamento di prevencion. Pero for di awor caba ta anticipa cu e tin di haber cu mantencion di e ekiponan cu ta uza eyden pa cushina y grill cuminda. E restaurant a cera 11:00pm pero algo mas cu mey ora despues, ya a yama Brandweer caba bisando cu e luga ta completamente na candela….mucho lihe pa un restaurant cu algun minuut prome tabatin trahado y cliente eyden ainda.
Di acuerdo cu rapport di Alarm Centrale di Cuerpo di Bombero, pa 11:39pm, un persona canando na pia dilanti Fermin’s Bar a yama 911 y a informa cu e restaurant ta na candela. E unidad di Brandweer a sali mesora y a yega super lihe pasobra pa 11:41pm, dos minuut despues, ya el a meldo na e sitio di candela caba. Mas o menos 15 minuut despues, ya e Bevelvoerder van Dienst (BVD) a informa Central cu nan tin e candela domina.
Ta bon pa aclaria si cu aña pasa caba e mesun cushina aki a pega na candela. Cuerpo di Bombero a confirma cu e doño a cumpli cabalmente cu tur e rekisitonan impone dor di departamentonan di Gobierno. E mester a corigi algun asunto y adapta su mapanan eydilanti pa por a cumpli cu medidanan adicional di siguridad. Cuerpo di Bombero mes a “keur” e mapanan y e trabounan di renobacion e tempo ey.
Pues kico a pasa awor, e unico cos cu ta keda lo ta falta di mantencion, pero esey lo analisa dialuna, ora e seccion di prevencion di Cuerpo di Bombero pasa cu nan wowo di control y investigacion riba e ruina cu a keda atras di e cushina. E investigacion Bomberil ta djis pa complementa esun di e ekipo forensico di Polis cu ya a cuminsa investiga ayera nochi mes caba na e sitio.
Mester añadi cu bisiñanan a bisa nos na e sitio cu henter e construccion di e cushina ta ilegal y ta crusa riba e “rode lijn” impone dor di DOW y Departamento di Infrastuctura y Planificacion (DIP). Bisiñanan ta duda cu Bomberonan por a aproba un mapa di un construccion ilegal!
