Departamento Meteorologico Aruba (Meteo) ta anuncia aviso pa calor excesivo debi cu ta acercando n’e parti mas calor di aña.
E relato ta sigui indica cu durante e temporada di aña aki lo bay sinti mas calor cu normal. Esaki t’e lunanan di augustus, september y october. E combinacion di temperatura y porcentahe halto di humedad ademas di un biento menos fuerte cu normal, lo pone cu por sinti malestar.
Temperatura maximo di e siguiente lunanan lo por varia di 34°c (93 f) pa 36°c (97 f). Porcentahe di humedad den 85 te 90% of mas, lo contribui na un indice di calor (temperatura aparente) rond di 43°c (109 f) te 46°c(115 f) cada dia.
E calor y humedad halto lo no baha mucho anochi, cu temperatura bahando solamente te un minimo di 27°c (81 f) te 29°c (84 f). Esaki lo aumenta e peliger pa hende cu no por haya un luga adecua pa refresca nan curpa.
Calor excesivo t’e asesino di tempo number un. Hende mester ta prepara p’e peliger cu calor excesivo ta causa. Mucha chikito, hende grandi y hende cu problema di curason ta esunnan mas exponi. Limita actividad pafo di cas p’e oranan trempan di mainta of ora solo baha. Si bo tin un airco cu ta traha, uz’e of a lo menos habri bentana pa laga aire pasa y circula.
ACCION DI PRECAUCION
Un aviso pa calor excesivo ta nifica cu ta spera un periodo di temperatura halto.
E combinacion di temperatura y humedad halto lo combina pa crea un situacion den cual
malesa causa pa exposicion prolonga na temperatura halto lo por presenta. Bebe hopi likido (awa of juice sin sucu), keda den camber cu airco. Keda aleha fo’i solo y ademas bisti paña di color cla, preferiblemente blanco.
