“E persona cu bo mester stima mas den e mundo aki ta bo mes, pasobra ora bo siña con pa stima y respeta bo mes ta bay compronde con pa stima esun band’i bo”, asina Eddie de Veer, CEO di MetaCorp, a expresa durante e “Mental Wellbeing Session”.
MetaCorp ta pone hopi atencion na e salud fisico di su empleadonan como tambe ta enfatisa e importancia di e salud mental.
Pa di dos aña consecutivo MetaCorp a organisa un sesion di salud mental. Semper MetaCorp a pone un enfasis riba e parti humano di e trabou, contando cu un structura mescos cu cualkier otro compania cu ta exitoso, pero nunca lubidando cu e esencia di mas importante ta e trahadonan y pa por conta cu trahado productivo y exitoso, ta necesario pa nan sinti e sosten y nos como MetaCorp ta brinda esaki na su empleadonan.
Pa mas cu 30 aña, MetaCorp ta conta cu un departamento social “in-house”, pasobra ta reconoce e importancia di esaki. N’e momentonan aki, e compania a crece cu un total di 3 trahado social pa sostene y guia nan empleadonan.
E aña aki, un bes mas, e departamento social a organisa un ‘Mental Wellbeing Session’ pa e empleadonan. MetaCorp a organisa cuater sesion den dos dia. Tur esnan presente tabata tin e honor di conta cu profesionalnan, Neomy Ruth Schoop y Belkis Moreu p’asina comparti nan conocemento cu e empleadonan y duna nan e hermentnan necesario. E tema principal tabata con pa desaroya un relacion y comunicacion sano cu bo mes y cu otronan.
MetaCorp ta orguyoso pa informa cu e cuater sesionnan tabata completamente yen y cu e empleadonan a demostra nan compromiso cu e sesionnan aki. E compania ta purba pa enfatisa cu asisti na tipo di sesion asina, no kiermen cu bo tin un problema, sino mas bien cu bo kier educa bo mes y sigui crece.
Mensahe final di parti di Eddie de Veer pa tur e empleadonan di MetaCorp y pueblo henter di Aruba ta: “Nos tur tin mester di ayudo na cierto momento y pidi ayudo no ta haci bo debil. Pidi ayudo ta nifica cu bo ta suficientemente fuerte y kier ta e miho version di bo mes. Corda cu pa tur cos tin un solucion”.
Tocante MetaCorp
MetaCorp ta existi desde aña 1920 y a start den negoshi di cine. Cu apertura di Lago a cuminsa cu E. De Veer Transport cu awendia yama ATCO cu despues a expande tambe den APEX y Ecotech. Despues di dos guera mundial a cumpra e planta di Coca Cola y asina a inicia Tropical Bottling, cu na caminda a expande tambe den Brouwerij Nacional Balashi. E compania a sigui desaroya cu apertura di New York Laundry y EcoGas.
MetaCorp ta e empresa comercial mas bieu na Aruba cu mas di 100 aña di existencia continuo. Cu un fundeshi solido, cu un cultura di compania basa riba principionan di inversionnan duradero y kere den empleadonan, MetaCorp awendia ta cla pa e siguiente 100 aña di progreso, cu talento manera Eddie de Veer, Guus Slabbekoorn y Shensly Tromp na cabes di e compania.
