Diahuebs a toca turno n’e alumnonan di Scol Cacique Macuarima haya carchi pa bay wak monster truck e fin di siman aki.
Eddie de Veer, CEO di MetaCorp, a splica cu e entrega a bay hopi bon. Esaki tabata e ultimo entrega cu tabatin ya cu no tabatin mas carchi. Ora cu nan a tende cu Scol Cacique Macuarima a keda afo pa haya carchi p’e muchanan bay, De Veer a corda bek cu tabatin candela n’e scol y a perde mita di e scol door di e candela aki.
De Veer tabata sa di biaha cu e scol aki lo por uza un ayudo. A tuma contacto un biaha mas cu e organisadonan di e show, cu a percura pa haya 236 carchi pa tur mucha di e scol por bay durante fin di siman pa bay mira e show di monster truck.
YUDANDO TRES SCOL
Semper MetaCorp ta purba di yuda unda cu por. Ta un placer pa duna bek na comunidad cada bes den un otro forma. E biaha aki ta duna ticket p’asina e muchanan bay disfruta. Tin otro momento cu a duna den un otro forma. Pero ki ora cu duna bek na comunidad, e ta sinti bon y ta parti di e responsabilidad como compania, De Veer a bisa por ultimo.
