Polisnan a reacciona riba suceso di diabierna 19 di februari ultimo y ta insisti cu nan colega, Gregory Wouters trahando na ward’i polis San Nicolas a actua corecto durante persecucion tras di e chauffeur Koedi Shakir di 25 aña di edad, naci na Merca y biba na New Jersey, cu tabata di vakantie na Aruba. E hecho cu nan colega a los varios tiro riba e chauffeur ta debi cu e no kier a para e auto ora a dun’e instruccion como tal. “Mester a tira pa para e persecucion”, asina a duna nos di conoce, aunke ta prefera di keda anonimo pa evita represalia.
Riba e alegacionnan cu a nace for di e rapport forensico cu un experto Mericano a haci riba e auto, basa riba e heridanan di bala cu e sospechoso a haya na su curpa, e polisnan ta sigura cu tin un splicacion valido su tras. Polisnan di San Nicolas ta convenci cu nan tur a actua corecto y cu si tabata na Merca, e resultado y modus operandi lo tabata igual, pasobra ey tampoco polisnan lo acepta pa core pa nan y manda auto riba nan.
Manera nos a informa caba, tabata diabierna anochi pa mas of menos 9:00 pm cu a prome yamadanan a cuminsa drenta di un auto coriendo pa loco riba Green Corridor na altura di Ser’i Teishi direccion pariba. E auto, durante e trayecto, a dal den diferente otro auto y a sigui core despues.
Na altura di e rotonde di FTA na San Nicolas, el a hera dal den un patruya di polis, cu ta esun cu a lora y sigui su tras mesora. E patruya, uzando su zwaailicht y sirena a persigui e auto y a duna e chauffeur femenino ordo pa para su auto. Nan a constata cu e chauffeur tabata na celular manera nad’un pasa y a sigui core bay, treciendo trafico den peliger constantemente.
Pa un relato mas amplio y detaya subi www.trempan.com
